Zonido duro constante por nifica risico eleva pa derame of attack di curazon

Cu zonido duro por haci daño na oido ta conoci pa hopi tempo. Pero investigacion recien ta mustra cu hasta por nifica derame celebral y/of ataca di curazon. Y pa habitantenan na Malmok, e ta otro muestra cu Gobierno no ta preocupa cu bienestar di ciudadanonan ni naturalesa.

Pasobra te ainda, a pesar di un cantidad di peticion pa regula, y te hasta para e tournan di UTV, ta produciendo hopi zonido. Un habitante di Malmok, un señora adulto mayor a laga hende bin midi e zonido na su cas cada biaha cu tin e aparatonan aki ta pasa, cu ta henter dia.

“Mi a papia cu Prome Minister, mi a hasta papia cu tata di un di e doñonan di e compania. Ningun hende ta preocupa. E tata di operador di tour a bisa mi cu su yiu ta gana riba 50 mil dollar pa luna y e no ta bay stop.”

E señora, cu ta un hende grandi y tin decadanan ta biba na Malmok, no ta compronde pakico Gobierno ta nenga di pone atencion na e problema grandi aki. “Y pa colmo, tur atardi, como 60 di e aparatonan aki ta bin para na Tres Trapi. Nan ta destrui henter e medio ambiente y nos calidad di bida.”

E dia cu e señora a laga midi e zonido, esaki a yega riba 89 decibel. Pa compronde decibel, cero ta silencio. Un murmur ta 15 decibel. Pero pa cada 10 decibel e ta nifica cu e zonido ta mil biaha mas duro. Un combersacion normal ta 60 decibel y ora ta coba banda di caminda, e ta 125 decibel. Zonido ta considera hopi duro si e ta riba 80 decibel.

Den otro palabra, e UTVnan ta causa un molester enorme di zonido unda cu nan ta pasa. Y ademas di zonido duro, nan ta causa molester enorme di stof pa barionan manera Sabanilla Abou y Ayo.

Riesgo pa ‘stroke’

Pero, locual ta preocupa e habitantenan, ta cu no solamente e ta un molester y ta pone tur hende rabia pasobra a kita tur trankilidad, e por ta un peliger hopi serio pa nan salud.

Un hende cu ta exponi na zonido duro tur dia ta core riesgo halto di haya un derame celebral (stroke), segun un investigacion cu a keda publica den Environmental Research. Investigadonan a conclui cu biba den un area cu hopi zonido, manera un ciudad of hasta camindanan cu hopi trafico ta aumenta e riesgo pa un derame cu 30 porciento, compara cu si ta biba den un area berde y keto, cu hasta ta baha e risico cu 25 porciento.

Un ambiente cu zonido innecesariamente duro ta stimula parti di e cerebro conoci como amygdala, cu ta regula con hende ta responde na stress. E cerebro ta reaccion door di hisa presion di sanger y e hormona di stress, cortisol. Ambos ta causa un cantidad di problema cardiovascular, segun Dr. Douglas Hildrew, di e Programa di Oido y Balans di Yale University.

Es mas, e American Heart Association ta adverti pa risico mas halto di atake di curazon pa esnan cu ta regularmente exponi na zonido excesivo. “Zonido excesivo ta mata e celulanan di cabey cu ta critico pa e cochlea, esta e parti paden di horea. E cabeynan aki ta elemental pa creacion di zonido den cerebro. Mescos cu un zonido duro diripiente por haci daño permanente, ta exponi na zonido duro constante tambe por afecta e oido, e cerebro y calidad di bida.” Y e daño na oido y e horea ta cuminza ora cu e zonido ta entre 85 y 90 decibel, segun David Owen, autor di Volume Control, Con pa tende den un Mundo Yen di Zonido Duro. P’esey e autor ta recomenda uso di proteccion di oido.

Pakico ta tarda

“Ami no sa kico Prome Minister Evelyn Wever Croes ta warda pa tuma paso pa stop e molester y peliger grandi cu tur cu ta biba den e areanan unda e UTVnan ta pasa ta exponi na dje, dia den dia afo,” ta e comentario cu a duna Bon Dia Aruba.

Locual a compronde cu e habitantenan a cuminza organisa nan mes pa mira ki paso nan mes por tuma.