Ayera Richard Helder e persona encarga cu General Aviation terminal, abisa cu e prome 6 lunanan di aña no tabata uno facil pa W Aviation, pa motibo cu Venezuela a cera frontera pa basta tempo.

Ora cu a habri frontera W Aviacion a opera normal bek. Despues a bolbe cera frontera, ora cu Venezuela a dicidi di habri esaki, Aruba ta esun cu a cera su frontera. “Nos a bay atras cu 76% den FBO ora cu a cera frontera cual ta un porcentahe basta grandi pa cuater of cinco luna ta basta pisa. Helder a bisa cu e decision aki a ser tuma pa tur e Ministernan hunto cu Prome Minister.”

Helder ta bisa cu “nos ta gradicido pa e confiansa y e oportunidad cu nan a duna nos pa asina nos por sigui duna servicio nan clientenan local y internacional.” Ta asina cu na prome luga mester ehecuta tur e condicionnan y rekisito pa siguridad di W Aviation y Aruba. Helder a splica cu, durante reunion entre gobierno y W Aviation, nan mester hustifica di nan banda.

Lo pone condicionnan pa e avionnan prome cu baha aki na Aruba, y nan lo mester bay firma un documento pa nan mesun proteccion y caminda cu nan ta mustra gobierno e esfuerso cu W Aviation ta haciendo pa siguridad di Aruba. E ta bisa cu esaki ta pa tene cuenta cu e cuponan di trabou cu tin y pa salvaguardia e cuponan aki.

Ta asina cu nan ta atende tipo di clientenan cu ta baha cu nan mesun avionnan; no trata di un avion cu tin AOC. Ta asina cu nan ta doño di e avionnan aki y ta bin cu nan famia of pa negoshi; nan ta bini tres dia of un siman y despues ta bandona e isla. Helder: “Ta asina cu nos tin cu percura pa e FBO pa esaki cu ta bay ta nos tarea; esaki nos lo hacie bon pa asina mustra cumplimento na e confiansa y e oportunidad cu a ricibi di gobierno, di cual cada un trahado ta contento y ta aprecia esaki.” Helder ta bisa cu nunca a yega di haya un caso di avion ta baha pa asina e pasaheronan pidi ayudo di asilo.

W Aviation a ricibi un carta di gobierno cu entrante diamars awor lo cuminsa opera y gobierno lo habri frontera pa FBO y tambe pa e parti di transito pa aerolinea di Aruba Airlines. Aruba Airlines por bula di Venezuela pa FBO baha na Aruba. Biaheronan cu baha aki lo laga nan firma un par documento prome cu nan drenta paden, pa asina por proteha nos mes riba tur e condicionnan rekeri di gobierno.

Manera indica den e articulo titula “Minister Andin Bikker: Maneho stricto di asilo politico a drenta na vigor caba” riba pagina 31, Gobierno di Aruba ta introduci un maneho nobo pa cu peticion di asilo. E procedura aki ta aplicabel pa e vuelonan cu lo yega for di Venezuela via W Aviation, como tambe Aruba Airlines cu ta opera un ruta entre Venezuela, Aruba y Merca. Solamente pasaheronan cu paspoort Hulandes lo ta permiti pa bay Venezuela y bin Aruba, y esnan cu ta di transito na Aruba pa bay Merca, lo mester cumpli cu e rekisitonan ariba menciona den e articulo aki.