Delegacionnan di Aruba, Boneiro y Corsou a reuni cu delegacion di Venezuela den siman cu a pasa. E reunion ta un asina yama ‘follow up’ di e acuerdo firma dia 12 di april. Conclusion: por lo pronto Aruba ta laga su frontera via lama cera. Proximo reunion entre e paisnan ta riba 6 di juni.
E acuerdo firma tabata entre e minister di Relacion Exterior, Stef Blok y autoridadnan Venezolano, y cu mester sirbi pa haci palabracionnan prome cu por habri e frontera bek. E discusionnan tabata na nivel tecnico riba tema di aduana, segun e comunicado di gobierno.
E fronteranan lo a keda cera te ora un convenio wordo firma. E convenio a wordo firma dia 12 di april y a keda palabra cu den reunionnan tecnico lo haci palabracionnan bou di ki condicion e transporte via lama por wordo resumi.
E delegacion di Aruba a enfatisa su posicion, cu tanten cu no tin claridad y transparencia riba procedura, documentacion y e autoridadnan competente, no por papia di ‘business as usual’. Corsou y Boneiro si ta permiti e barconan drenta por lo pronto, pero tambe ta insisti cu mester tin e claridad y transparencia ey.
E delegacionnan a haci e palabracion cu den e siguiente dianan lo intercambia documentonan y e lista di productonan cu Venezuela ta designa pa consumo nacional of riba cual tin restriccion pa exportacion. Y a palabra un siguiente reunion pa dia 6 di juni na Venezuela.
Pa e momento ey lo mester tin claridad di con lo bay resumi e transporte via lama na un manera transparente y cu e debido documentacion y proceduranan aproba pa ambos parti. Mientras cu no tin e claridad y transparencia aki, e fronteranan di Aruba ta sigui cera.
E problema a cuminsa dia 5 di januari, momento cu autoridad Venezolano a acusa paisnan Corsou y specialmente Aruba di ta participa na contrabanda di material strategico for di Venezuela. Esey tabata motibo pa Venezuela a cera frontera aereo y via lama entre Venezuela y e islanan Aruba, Boneiro y Corsou.
Di parti di Aruba, gobierno di Aruba mesora a nenga esaki categoricamente, y mes momento pa evita escalacion di e situacion, a prohibi tur importacion desde Venezuela tanten cu no tin claridad y transparencia riba e procedura y documentacion aproba pa Venezuela, e comunicado ta finalisa bisando.
