Mediante un comunicado di prensa, Gobierno di Aruba a informa cu frontera aereo cu Venezuela ta permanece cera pa cuatro luna mas. Aunke no a duna mas detaye, esaki por ta debi na situacion politico y social cu e pais bisiña ta enfrentando na e momentonan aki despues di eleccion di dia 28 juli ultimo.
Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
For di e momento ey, diferente instancianan na Aruba a cuminsa prepara pa habri e frontera aereo y tabata spera cu den prome kwartaal di 2024 lo por a duna un indicacion di ki dia e frontera aereo lo habri, pero esey no a sucede.
Por recorda cu na december ultimo, diferente medio Venezolano tabata indica cu Aruba ta preparando pa reapertura di frontera aereo cu Venezuela, unda cu e decision ey a cay di sorpresa na e fuentenan relaciona cu e sector aeronautico Venezolano, cu tabata señala cu tabata “casi sigur” cu lo kita e prohibicion aki na comienso di 2024, despues cu Corsou a dicidi di habri back e trafico aereo na april di aña pasa.
December di aña pasa, prome minister Evelyn Wever-Croes den un conferencia di prensa a bisa cu “Ora cu nos a habri e frontera maritimo cu Venezuela na comienso di e aña 2023, den prome mita di aña, un di e condicionnan tabata cu Venezuela ta bay haci mas na controlnan preventivo na su costa, specialmente estado Falcon, cu ta esun mas cerca y cu mas frecuentemente ta sali boto pa Aruba.”
“Nos no ta mira mucho di esey ta tuma lugar. Pasobra nos ta weita varios boto cu a drenta, y e ora ta mustra cu di nan banda no ta haciendo suficiente. Pues un di e prome cosnan cu nos a haci ta pidi nan pone mas atencion riba e aspectonan preventivo di e control di costa ayanan,” el a agrega
Considerando cu entrada ilegal ta bira un forma pa drenta Aruba mientras cu e frontera legalmente ta cera, Wever-Croes a sigura cu “Comunicacion cu Venezuela ta bay a traves di ministerio di Relacion Exterior di Hulanda, door cu relacion exterior ta un asunto di Reino,” Wever-Croes a indica. “Y akinan, nos departamento di Relacion Exterior, embahada, consulado, tin contacto cu otro tambe.”
