Ayera mainta un medio di comunicacion na Spaño estableci na Aruba a publica un articulo den cual tabata sigura cu frontera di Aruba cu Venezuela a ser habri y cu for di ayera diahuebs lo cuminsa vuelonan directo for di Aruba pa Venezuela y viceversa.

No obstante, e noticia aki tambe a keda publica pa otro medionan di comunicacion Venezolano, loke a causa impacto entre residentenan di Aruba cu nacionalidad Venezolano cu kier biaha na nan pais y tambe esnan cu ta na Venezuela y kier bin Aruba.

Pa cu esaki, redactor di Bon Dia Aruba a tuma contacto cu prome minister Evelyn Wever-Croes ken actualmente ta na Hulanda, pa haya sa si e informacion aki tabata berdad. Wever-Croes a contesta cu e noticia aki “no ta corecto. Nos tine cera ainda, pendiente di autoridadnan Venezolano. Nos ta trahando si riba dje”, el a sigura.

E noticia aki a bin dilanti despues cu riba e red social Twitter un abogado specialista den aeronautica di e firma internacional di abogadonan Clyde & Co di nomber Rodolfo Ruiz A. a sigura cu “Aruba a elimina e NoTAM cu tabata restringi e vuelonan desde Venezuela pa Aruba.” E NoTAM tabatin fecha for di 10 juni di 2022 te 22 di juli di 2022.

Notices to Air Missions (NoTAM), di acuerdo cu Organisacion di Aviacion Civil Internacional, ta un aviso cu ta contene informacion aeronautico cu ta indispensabel pa personal cu ta realisa operacionnan di vuelo. E ta inclui tur tipo di personal den relacion cu aviacion y ta wordo presenta na autoridadnan di aviacion pa alerta e tripulantenan di aeronave riba e posibel peligernan den un ruta di vuelo of un luga cu por afecta e seguridad di e vuelo.

Sinembargo, minuutnan despues un otro NotAM a ser publica, pero cu un fecha for di 21 di juli 2022 te 21 di october di 2022, for di cual por a compronde cu a keda extendi cu tres luna mas, manera e ceramento di frontera cu Venezuela ta wordo actualisa na Aruba cada tres luna.

 

Di mesun manera, tambe Gobierno di Aruba a publica un comunicado di prensa indicando cu e informacion cu tabata circulando riba rednan social no tabata corecto:

“Ta informa cu Gobierno di Aruba ainda ta den negociacion cu autoridadnan Venezolano.” Prome minister a accentua cu e negociacionnan ta bayendo bon, pero no ta facil pa habri frontera sin mas pasobra esaki ta rekeri hopi diplomacia di ambos pais y palabracionnan concreto di hopi medida di control cu mester haci. Prome minister ta pidi tur ciudadano di nos pais, specialmente ciudadanonan Venezolano cu a haci di nos pais nan hogar, pa keda trankil y no kere noticianan cu no ta sali for di Gobierno di Aruba. Gobierno di Aruba ta sigui cu e esfuersonan pa yega na un apertura di frontera na forma responsabel y controla, pero pa esaki mester di mas cooperacion di autoridadnan di Venezuela”.

Redactor di Bon Dia Aruba tambe a haya riba Twitter un tweet di ‘Embajada de Paises Bajos en Venezuela’ den cual tabata anuncia cu: “Ta circula rond e noticia riba e eliminacion di restriccion di vuelonan entre Aruba y Venezuela. Esaki no ta corecto. Por fabor, no tuma contacto cu boso agente di biahe.”

Tur cos a cuminsa na momento cu frontera di Venezuela cu Aruba a keda cera pa presidente di Venezuela, Nicolas Maduro pa un periodo di 72ora, dia 05 di januari di 2018. E medida aki tambe tabata dirigi pa e islanan di Corsou y Boneiro. E tempo aya, Maduro a sigura cu e decision aki tabata “pa presiona pa un intercambio sano”.

Na 2019, prome minister Wever-Croes a tuma nota cu vice-presidente di Venezuela a declara cu nan tabata dicidi pa habri e frontera, pero dia 10 di mei el a firma un decreto pa cera e frontera entre Aruba cu Venezuela. Esaki motiva na e situacion politico, economico y social cu e pais bisiña tabata pasando na unda Aruba a registra un aumento di migrantenan cu na e momento ey, por tabatin efectonan riba orden publico y seguridad di Aruba, cu ta den interes general.

For di e momento ey, ningun boto ni avion tanto comercial como di carga por a drenta Aruba biniendo for di Venezuela, loke a causa cu berdura y fruta cu un prijs mas accesibel no por drenta na e isla mas. Residentenan di Aruba solamente por biaha pa Venezuela for di otro paisnan como Panama y Republica Dominicana, lo cual ta trece como consecuencia gastonan hopi halto pa e biahero mes.

Mientras tanto, Venezolanonan tanto na Aruba como na Venezuela ta sigui na espera di e cooperacion necesario cu e tema aki tin mester di autoridadnan Venezolano, aunke ta importante pa destaca cu Venezolanonan mester solicita un visa pa por drenta na e isla.