Esunnan den gobierno ta kere cu no
Un di e frasenan hopi uza ainda contra e partido grandi den oposicion, di banda di e partido den gobierno, ta e famoso friends & family. Si nos mester kere nan, e fenomeno a stop di existi na 2009, ora nan a drenta gobierno. Nos lo desea cu ta berdad! Un alivio hopi grandi esey lo tabata. Lamentablemente, nos realidad ta otro. Friends & family a proba di ta un mal, un plaga cu no ta laga nos. Y loke nos por a presencia den e ultimo dos periodo di gobernacion, ta haci nos kere cu e formula ta alive and kicking. Es mas, nos por a presencia poco ehemplo di eleva e formula y loke ta bin cu ne, na nivel di arte, of ciencia. Aunke nos mester bisa cu e fenomeno di nepotismo refina no ta existi aki so: na Merca, sin tanto critica riba esey, e presidente tambe a logra un familiacracia den Cas Blanco, convertiendo esaki den un Trump Tower chikito.
Parce cu mescos cu e Hulandesnan, e Mericanonan a lubida di skirbi e ley cu ta simplemente prohibi e funcionamento di casa y yiu den funcion oficial. Ora pa decadanan, o hasta siglo, bo ta supone cu tur hende ta na altura di e regla di oro, cu bo no ta practica nepotismo, ta yega un dia cu ta bin un montuno cu ta puntra bo: “Y unda e ta skirbi?” Y acto siguido ta dal bay y haci manera e kier, pasobra segun e, no tin ley pa strob’e. E ta zona conoci? Probablemente. Por ehemplo nos prome ministro actual ta un maestro den viola regla cu den Reino Hulandes nan ta considera sagrado. Manera organisa bochorno dilanti oficina di gobernador, sali pafo anto conta cos cu supuestamente a discuti cu e gobernador, ta algo not done pero segun e, e reglanan ey no ta conta pe. Cu e consecuencia cu e Hulandesnan ta keda babuca di mira un persona actua asina, na luga di corta su paso mes ora.
Nos a mira e mesun actitud aki den e asunto di e ministro bao acusacion hudicial. Mientras cu e ta argumenta cu e cos aki no ta regla den constitucion y p’esey e ta bay fia regla cerca otro (St. Maarten) pero ta interpreta esaki na su manera y ta crea e figura nobo di e ministro sin cartera, cu no ta suspendi, no tin responsabilidad, pero ta keda ministro. Cu na e momento aki un gran parti di prensa ta purba interpreta e situacion cu a surgi, awor cu e ministro ta deteni, esey ta di comprende. Na e momento aki e aresto di e ministro no ta haci tanto diferencia pasobra a maniobra e ministro caba den un posicion di suspension, sin uza e palabra cu no ta cambia awor cu e ta cera. Ta te ora cu finalmente tin un sentencia irevocabel, anto e lo no ta ministro mas. Mientras tanto e por a baha pa decencia, pero no. Si bin discusion ainda na final y ta tarda cu su retiro, e tin su remedi si. Esey ta den forma di un decreto real (KB) cu ta pone un fin na tur cos. Pakico? Pasobra tur ministro ta ministro di Rey, y ora cu e Rey haya ta basta, anto e ministro por haya su retiro, sin importa kico e gabinete kier.
Pero ban bolbe na e tema di family. Naturalmente e partido den gobierno lo defende su mes bisando cu nan no tin tanto famia ta colga rond na despacho di e ministronan. Nos no ta bay den detaye, y ta kere tambe cu esun ministro no ta manera e otro. Pero no por descarta cu tin caso, manera esun cu a drecha tur caya den su vecindario, pa e bishita di mainta tempran y atardi laat por lo menos por sinti nan mes comodo. Ta parce cu gobernacion a muda, sin bisa nos. Y ta tene audiencia, unda e esposa ta parce di funciona como vice ministro. Calidad di gobernacion.
Awor, e friends cu ta un grupo hopi mas amplio y hopi mas interesante cu e famia. Nos por a mira ultimamente cu entre e amigonan aki tin hopi cu ta brinda servicio na gobierno, sin licitacion y pa asunto cu ta parce mas di partido cu di gobierno. Problema ta cu e prome ministro tin dificultad pa distingui entre su papel di lider di partido y di mandatario. Nos mester pordona su persona anto cu e ta uza placa di nos pa paga campaña di su partido? No, y nan no por bin cu e defensa cu ‘esunnan prome cu nos tambe tabata haci asina, pakico culpa nos?’ E contesta corecto lo ta: “No ta boso a gana eleccion na 2009, y ripiti na 2013, pasobra boso lo a caba cu e fenomeno aki?”
E ambiente festivo di añanan largo, cu a percura pa e caso mas serio di patronahe politico den historia di Caribe Hulandes, a percura tambe pa un ambiente den cual corupcion por a florece na un nivel nunca bisto na Aruba, ni riba e otro islanan. Nos ta permiti e siguiente gobierno ripiti?
