Departamento di Impuesto ta confrontando un investigacion grandi di malversacion. Segun informacion cu nos redaccion a ricibi, a entrega keho na landsrecherche y Ministerio Publico despues cu descubri cu e hoofdkassier di DIMP tabata uza tacticanan cu ,segun informacion, a conduci na un malversacion di 800 mil florin.
Bon Dia Aruba a tuma contacto cu Director di DIMP, Luenne Pietersz, kende a referi na Ministerio Publico pa mas informacion.
Locual fuentenan a informa Bon Dia Aruba ta e malversacion tabatin mas di tres aña tumando luga y cu e hoofdkassier tabata haci transaccionnan cu slipnan di pago, pa asina por saca placa. Specificamente tabata uza su propio payslip pa asina tapa e hecho cu falta placa den e caha. E practica aki a tuma luga pa tres aña y a yega na e suma cuantioso aki.
E caso a keda descubri algun tempo pasa caba, pero nunca a publica esaki. Personal di DIMP ta conoci cu e caso serio aki, y sa tambe di ken ta trata mirando cu ta un hoofdkassier tin.
Segun informacion, Director di Departamento di Impuesto a forsa e persona en cuestion firma un documento, y a mand’e cas y a pasa e caso pa landsrecherche. Ministerio Publico ta encarga cu e caso awor aki.
Bon Dia Aruba a tuma contacto cu Ministerio Publico riba e caso aki y segun vocero Ann Angela, lo duna mas detaye asina cu logra haya mas informacion cu por comparti.
