Fraser: ‘Uzo di beach ta keda di pueblo’

Casi dos siman pasa tabatin riba medionan social keho tocante situacion na Mangel halto caminda hende tabata bisa cu esnan cu ta biba den vecindario a drecha e luga pero tambe a blokia e luga pa auto parkeer.

Curtis Fraser director di Infraruba a duna di conoce cu tin un situacion reinando caminda hende den vecindario a drecha e beach ‘masha bunita’ pero nan a dicidi cu auto ta para mucho cerca y nan no kier esey, ‘nan ta blokia e caminda pero esey no mag’.

Aunke ta contento cu nan ta cuida naturalesa y lama, segun Fraser e ta keda un area publico y no por blokia pa otro ciudadano cu kier disfruta di area. A manda un carta pa splica e situacion. Nan a splica cu ta area bunita pa henter e pueblo ‘hende a compronde y remedia e situacion’.

Tambe por a tuma nota, cu tin apartamento, casnan cu ta transforma den hotel. Fraser ta splica cu tin negoshi ta lanta y nan ta purba tuma locual ta di pueblo pa nan. “Nos a mira esaki pasa pero no mag.”

E areanan rond di Mangel Halto ta destina pa publico pa ley. El a agrega cu tin area banda di hotel caminda tin algun doño di hotel ta haya permiso pa uza e areanan pa pone por ehempel cabana cerca di lama pero si un local bin y kier sinta, e tin derecho pa keda pasobra ta un area publico. Nan tin un permiso pa huur sinembargo esey no ta haci nan doño di lama.

Cualkier local por bay bou di un palapa dilanti di Eagle Beach of Baby Beach y haci uzo di dje. Nan ta haya cierto informacion di Infraruba cu ta bisa cu nan ta haya nan mes den situacion cu doño no kier pa nan sinta eynan.

Tin diferente area di beach rond di Aruba tambe, e ta informa cu e beach policy ta cu e ta keda di pueblo y si tin hende cu ta viola e derecho di pueblo nan por yama polis. Nan ta mantene un file cu tur keho caminda si nan ‘tin three strikes nan ta out’.

“E ta bon pa bay riba Facebook y pone kico hende ta haci fout pero no mester stop eynan, e por bay mas leu y yama polis y bisa cu tin hende violando e derecho di pueblo anto esey ta conta pa tur caminda”, Fraser ta bisa.

Nan por pasa duna keho na Infraruba pa asina por cana caminda legalmente. Asina por raporta esaki anto e keho ta bay den e file di e negoshi of luga. Pasobra e permiso ta wordo duna pa DIP y nan tin permiso pa kita esaki conhuntamente cu KPA si dicidi riba esey.