Fraciana Colina Gonzalez cu awe ta yama su mes Fransua Colina Gonzalez, un inmigrante cu a dicidi di haci un proyecto di su bida bibando na Aruba.
Fransua tin shete aña ta biba na Aruba y e la adopta na e cultura Arubiano hopi lihe paso e ta gusta su hendenan, aunke cu e ta stima su cultura tambe. E proyecto yama ‘Fransua: inmigrante, amor y lucha’ cu ta papia di su persona como inmigrante cu a yega Aruba cu yen di miedo y balornan den un tas cu e la perde memey di e lamanan grandi entre Venezuela y Aruba.
Fransua a yega Aruba como un ilegal y awe e ta un otro persona. Sinembargo e no a bin djis pa bin Aruba e tabata namora di un persona y a tuma e decision pa lucha y sinti y wak kico Aruba lo trece p’e.
Actualmente e proyecto di Fransua Amor y Lucha ta un buki audiovisual cu lo bira un realidad aki un luna, unda cu varios Arubiano y Venezolano a bay den colaboracion pa haci e proyecto aki posibel. E proyecto mes ta trata di un bida di tres aña na Aruba, unda cu a pasa diferente facetanan di bida unda cu tabatin amor, teror, pero cu tur ta capitulonan di su bida real na Aruba – cu no tabata uno facil. Sinembargo na momento cu e la yega na HIAS tabata un porta cu a habri unda cu por a sinti cu e ta un persona cu tin balor y ta na bida aki na Aruba. Y aki ta caminda cu e idea a nace pa bin cu un buki audiovisual unda cu ta relata su bida den tres aña cu e ta na Aruba.
Ta un realidad cu hopi Venezolano ta bin Aruba y ta pensa cu e bida aki ta facil, esaki no ta cuadra cu berdad. Segun Fransua, el a pasa momentonan di alegria unda cu tabatin amor, desafio, temor, burla y hopi sentimentonan negativo cu a yega te hasta den un grado di etapa cu a kibra su mes como persona. Pero na mes momento e la crea den un abundancia positivo cu actualmente Fransua kier pa mundo sa cu den tur cos negativo por crea algo positivo.
Den tur esaki ta trata pa bo tin un amor propio y esey ta algo hopi bunita cu un ser humano por tin pa su mes. Den su experiencia, na momento cu e la haya esaki pa su mes, tur cos ta cana y florece di un manera cu bo no ta spera. Den tur esaki, respet ta algo hopi importante, na momento cu bo ta respeta e otro persona y bo ta laga e otro persona sinti esey, bo mester por haya back e mesun respet. Segun Fransua hopi hende a yam’e pa loco, mirando cu e ta un transgenero. Na Aruba e lo bay cuminsa cu un tratamento di testosterona, cual el a cuminsa cune na Venezuela, pero debi cu e la bin Aruba e no por a sigui cu e tratamento. Awor na Aruba e lo cuminsa back cu su tratamento.
Segun Fransua den tur e proceso cu e la pasa loke tabata hopi importante p’e, ta su creencia den Dios. “Na momento cu confia den Dios tur cos ta cana manera debe ser. Tambe tin hopi confiansa den bo mes y na momento cu bo kier bo ta logra y esey ta depende di bo como persona y e madurez di bo mes.”
Segun Fransua cada situacion cu e la pasa den bida ta hacie un miho persona y bira madura ta e enseñansa di bida. Na momento cu un persona no madura ta pasobra e no a biba situacionnan duro den su bida. Banda di tur su retonan, Fransua a traha un producto nacional cu yama Pika Caribe, cu ta un receta di su tata cu e la pone un poco sabor di Aruba den dje y ta su producto cu e ta kere den dje y a haci esaki pa Aruba.
Fransua ta gradici na e comunidad di Aruba cu a acepta su persona manera cu e ta y cu a dun’e e oportunidad cu e por ta su mes riba e isla. Nunca e no a keda desprecia pa Arubianonan, pero lamentablemente pa su propio hendenan Venezolano e la keda reprocha. Esaki sigur ta momentonan dificil cu a pasa unda cu bullying a hunga un rol hopi grandi y cu a bira hasta maltrato mental.
Sinembargo awe Fransua a pasa den tur e retonan aki y kier pa comunidad di Aruba ta consciente principalmente esnan cu ta cera den un buraco scur, cu loke ta mas importante den bida ta bo trankilidad, cu ta keda ilustra na momento cu ta papia y ta expresa na un manera for di bo alma y ta papia cu e berdad. Semper lo ta bay tin un hende cu ta bay scucha bo. Sea cual edad cu bo por tin, siña stima bo mes y acepta bo mes di e manera cu bo ta tur cos ta bay cana di un manera cu bo mes no ta spera.
