Frans Ponson, CUA: “Si tur hende ta paga BBO, e no lo mester ta 7%, e lo baha sigur”

Manera a keda publica den varios portal di noticia, dia 1 di juni Gobierno di Aruba ta bay introduci BBO aan de grens (BBO na forntera) ora di importa. Pa e comunidad di comerciante na Aruba, esaki ta trece un preocupacion grandi. Frans Ponson, presidente di Comerciante Uni Aruba (CUA) a splica durante un conferencia di prensa con esaki por tin un efecto negativo den comercio si no hacie di e manera corecto.

Ponson a remarca cu CUA ta para tras di BBO ora di importa. El a splica cu na momento cu nan a trece esaki pa dilanti aña pasa tabata ora cu tabata papia ainda tocante e aumento di BBO. El a sigura cu CUA ta un di esnan cu a bisa cu mester cobra pa importa, pasobra e ta hacie mas husto pa tur comerciante na Aruba ya cu tur hende cu ta importa producto na entrada cu no ta pagando ta competi cu tur e comercio na Aruba.

“E BBO na importacion ta hacie mas husto y esnan cu no ta paga tambe ta contribui, pasobra Comerciante Uni sigur ta un cu ta kere cu si tur hende ta paga, e BBO lo ta mas abao,” Ponson a bisa.

El a ratifica cu e tempo ey tambe CUA a bisa, hunto cu esaki, cu si mester paga na entrada mester haci esaki prome cu subi e tarifa di BBO di 6% pa 7%. Esey tabata e conseho di CUA y Ponson ta subraya cu nan ta para tras di esaki y na mesun momento, el a bisa, mester introduci esaki prome cu aumenta BBO pa wak cuanto placa ta drenta caha di gobierno.

El a splica cu apenas siman pasa CUA a wordo yama na DIMP pa un reunion pa scucha tur e informacion y tabatin hopi pregunta di parti di e organisacion cu ainda no tabatin ni contesta riba dje. El a enfatisa cu esaki ta algo hopi preocupante pa nan.

Raad van Advies no a duna conseho ainda ariba e introduccion di BBO na frontera, e ley no a yega parlamento ainda y gobierno kier introduci esaki dia 1 di juni. CUA ta di acuerdo cu e introduccion di e ley aki, pero Ponson ta accentua cu mester hacie na un manera responsable. “Mi no ta kere cu ta responsable si nada di esaki no ta cla pa 1 di juni nos introducie,” el a bisa.

El a sigui splica cu si un comerciante no sa kico e ta y door cu e no ta compronde y no tin contesta riba preguntanan, y como cu no tin tempo pa splica tur comerciante na Aruba, un comerciante por haci fout di buta gastonan cu e no ta compronde den su prijs. Pa prome, subi prijs pa consumidor, cu ta algo cu por pasa pa motibo di introduci algo den un luna cu niun hende no sa kico precies e ta encera.

Pa di dos, e comerciante por saca su mes for di competencia cu prijsnan demasiado halto cu tambe ta un problema pe na momento cu e comerciante siña y realisa cu e tin cu baha su prijs back.

“Pero pakico haci tur e problemanan aki si nos por educa tur comerciante prome? Y e reunionnan aki, pakico nos no tabatin nan na januari? Nos por a haci e cos ki responsable, introducie na juni y nos por a papia cu tur e comerciantenan,” Ponson a agrega.

CUA ta informa su miembronan, pero esaki ta un grupo chikito y na Aruba tin miles di comerciante cu no tin claridad ainda ariba e topico aki, tin hopi pregunta cu ta habri y hopi debate cu tin ainda.

“Si nos no ta compronde ainda y no tin claridad y e cos ki no yega parlamento, den nos parecer e ta iresponsable pa 1 di juni trece algo cu niun comercio no ta na altura di dje. Nos ta para tras di dje, nos ta contento cu CUA tin oido na gobierno, pero mi ta kere cu mester haci nan un tiki mas responsable y haciele e manera corecto y bon di biaha,” el a manifesta.

Ponson a splica cu e BBO aki, BBO bij import, e comerciante legal cu ta paga su BBO fin di luna, aworaki cu e ta bay paga na import e por kit’e di biaha fin di luna, sin importa si e producto ta wordo bendi.

El a enfatisa cu tin hopi confusion riba esey. Pero el a splica cu tur loke e comerciante a paga – si por ehempel el a paga mil florin na entrada – e por kita e cantidad ey di biaha fin di luna. Kiermen pa e comerciante legal, el a indica, e no ta supposed di trece mas gasto.

Pero hopi comerciante chikito na Aruba cu no sa di ley aki, cu ta lucha cu placa, tin cu pre-financia e BBO pa paga gobierno loke el a bende sin cu el a bende ainda, cu ta un problema pa hopi comerciante chikito.

Pa e comerciantenan cu ta cumprando riba internet, cu ta cumpra riba Amazon y bende riba internet, Ponson a splica, e comerciantenan aki aworaki ta bay haya un 7% extra cu nunca nan a paga, cu ta husto.

Ponson ta enfatisa cu, den su opinion, e no ta kere cu e ta responsqble pa pasa e ley di BBO aan de grens dia 1 di juni mirando cu, den CUA mes y papiando di e grupo ey so, tin hopi hende no ta compronde con e ley ta traha.

El a subraya cu si siman pasa e organisacion a wordo yama na DIMP y no tin tur contesta ainda, y pa ora cu nan haya e contestanan aki, CUA ta bay duna un presentacion pa splica su miembronan, cu ta un grupo chikito so, kico lo pasa cu e miles di resto di comerciantenan cu no ta compronde.

“Ami ta kere cu ta iresponsable pa 1 di juni nos hacie. Nos por hacie, manera nos ta wak hopi cos ta pasa, pero mi ta kere si nos no kier wak foutnan wordo haci den comercio cu por influencia e mesun pueblo, loke nos no kier tampoco pasobra pueblo mester por cumpra. Mi ta kere of nos mester sali lihe cu tur splicacion, pasa e leynan y cuminsa duna training na tur hende of mester atras’e un tempo pa hacie mas responsable,” Ponson a destaca.