Riba dia di labor e Departamento di Labor no ta controla si tin tiendanan cu no ta cay den e sector di horeca ta habri riba e dia aki. Polis ta e departamento cu tin e autorisacion segun ley pa cera e tiendanan cu no ta cumpli cu e leynan cu ta den e ordenansa laboral.
Control
Departamento di labor eigenlijk no ta encarga pa controla cu tiendanan ta cera. “Pero nos por bisa si cu nos por controla esey, pero normalmente ta asina cu riba e dia aki si topa un negoshi of tienda cu ta habri y cu mester ta cera, normalmente polis ta esun cu ta acudi na e negoshi y ta pidi nan pa cera,” segun director di Departamento di Labor, Sr. Franklin Kock.
Den e ultimo temponan ora di dia di labor, e director mes ta djis core rond pa mira si e tiendanan ta respeta. E ta haya si cu e tiendanan mas y mas, principalmente e tiendanan manera minimarket, e Chinesnan, ta respetando e dia aki. Mas y mas e ta ripara cu polis ta interveni ta bahando.
E leynan laboral ta conta solamente pa trahadonan, pero den e caso aki pa motibo cu tin un maneho sincronisa hunto cu Departamento di Asuntonan Economico cu ta bisa e tiendanan tambe mester ta cera, anto e ora esaki ta conta pe doño di e tienda tambe cu e no mag habri e luga. E departamento di Asuntonan Economico tambe ta estricto riba dia di labor, bisando cu e no kier pa e tiendanan ta habri pero pa hendenan bay sosega y reflexiona e importancia riba e dia di labor.
Pa cualkier pregunta huridico
Pa por comunica cu Departamento di Labor, segun e director, pa e parti huridico pa atende cu tur pregunta na nivel huridico ta e hurista Sra. Gwendy Kock, kende ta disponibel pa atende cualkier pregunta cu comerciantenan tin si nan tin duda.
Cambio di fecha
Un otro dia cu a cambia, ta dia 30 di april y esaki a bira 27 di april. Den pasado tabata celebra 30 di april di Reina Beatrix, pero pa motibo cu el a baha y Rey Willem-Alexander a tuma over esaki tabata dia 27 di april. Segun e director, e cambio a bin na peticion di Reino Hulandes cu ta celebra riba e fecha di 27 di april. Esaki a pone cu aki na Aruba a bin cu e cambio aki bayendo riba e pensamento ey pa asina den Reino ta tene e celebracion riba e mesun dia.
