Ora ta trata dianan liber oficialmente pa sectornan priva y publico, esaki semper ta trece cun’e discusionnan. Segun e ordenansa laboral tin 11 dia di fiesta, aunke cu tin diferente dia di fiesta 1 so tin un status special. Sr. Franklin Kock, director di Departamento di Labor a splica mas riba e asunto aki.
Tin e ordenansa laboral 2013 di cual esey ta e ley cu ta regla e oranan maximo cu trahadonan mag di traha pa dia, pa siman, pa cuanto siman y pa aña. Tambe e ordenansa laboral tambe ta regla e momentonan cu e trahado mester di su sosiego, pero tambe ta regla si e trahado wordo pidi pa traha durante su oranan di sosiego con e pago meter wordo haci, cual ta e compensacion di overtime. Den e momento di sosiego tambe ta regla e dianan di fiesta, segun Sr. Kock.
Dianan oficialmente festivo
Den e ordenansa laboral 2013 ta regla oficialmente e dianan di fiesta. Segun esaki tin oficialmente 11 dia di fiesta, di cual ya caba algun a pasa caba. E dianan di fiesta cu a pasa caba ta aña nobo cu ta 1 di januari, dia di Betico Croes esta 25 di februari, luna di carnaval 8 di februari, dia di himno y bandera cu lo ta dia 18 di maart. Tambe tin dia 25 di maart cu ta diabierna santo, e di dos dia Pasco resureccion cu ta 28 di maart, aña di rey cu ta 27 di april, dia di labor cu lo ta dialuna 2 di mei. Otro fechanan cu ainda mester bin ta Asuncion cu ta 5 di mei, Pasco di nacemento diadomingo 25 y di dos dia di Pasco cu ta 26 di december 2016.
Dia cu status special
Den tur e dianan aki di fiesta, e dia cu tin un status special cual ta e unico ta dia di labor, director di Departamento di Labor a indica. “Loke ta logico. Pasobra aki nos ta papiando di leynan laboral, e ora ey automaticamente dia labor ta haya un status special cu ta encera cu si dia di labor ta cay riba un diadomingo of un dia di fiesta, e fiesta di dia di labor ta hala automaticamente pe siguiente dia di trabou. E aña aki ta e caso pasobra 1 di mei ta cay riba diadomingo,” el a bisa. Esey kiermen e ora cu e celebracion di dia di labor lo tuma luga dialuna 2 di mei 2016. Segun Sr. Kock, esaki ta nifica cu e dia aki ta un dia di fiesta pa tur trahado, pero naturalmente ta bin acerca tambe cu tin trahadonan cu ta traha den tienda. E pregunta cu ta bin dilanti ta cua tienda lo ta habri of no. Esaki lo mester cay bou di e Departamento di Asuntonan Economico, segun e director. E maneho di e departamento aki ta cu di tur dia di fiesta e unico dia cu nan ta exigi pa tur tienda ta cera ta dia di labor. Pero loke cu no ta cay bou e departamento aki ta e parti di horeca, esta hotel, café y restaurant, eseynan si lo por ta habri. “Esaki lo ta logico. Nos no por lubida. Pasobra nos economia ta hopi basa riba turismo,” el a indica.
Esaki ta e sector di economia di Aruba cu ta duna turistanan servicio. Sr. Kock ta kere den e pensamento ey, e maneho di horeca ta cu e no ta wordo afecta cu e decision di Departamento di Asuntonan Economico. “Si dialuna bo mester core rond, bo mester por wak cu tur luga ta cera menos e negoshinan cu ta cay bou di e sector horeca.”
Esunnan cu lo mester traha den e sector di horeca riba e dia ey, tin un recompensa. Si tin hende den horeca ta traha riba e dia ey, segun ley nan lo wordo recompensa riba e dia ey aunke cu e ta un dia ta un dialuna di fiesta. E pago riba e dia aki lo ta uno di 200 porciento, cu ta un recompensa pa e trahadonan cu ta traha riba e fecha menciona, segun director di e departamento.
Pero por lo demas banda di e sector aki, tur otro negoshi mester ta cera pasobra mester respeta dia di labor.
Reflexiona riba trabou
E pensamento ta mas o menos tambe pa dia di labor, ta cu e legislado lo kier pa e trahado gosa di su dia mas tanto posibel riba un dia di trabou. Pa por reflexiona riba su trabou riba un dia di trabou, Sr. Kock a indica. “Esey ta e pensamento. Pero pa motibo ey a bin cu e stipulacion aki den ley. Si e cay riba un dia cu por ta un dia di fiesta of un dia liber, en todo caso e por hala pa un dia di trabou cu ta conta pa tur trahado. Esey ta e pensamento su tras.”
