Caso Avestruz ta e caso mas grandi di corupcion di tereno na Aruba. Un total di 11 sospechoso ta wordo acusa den e caso caminda e sospechoso principal ta ex-minister y actual parlamentario Sr. Oslin “Benny” Sevinger.
Durante e proximo dianan Bon Dia Aruba lo detaya un biografia chikito di cada di e sospechoso pa asina pueblo di Aruba por conoce e sospechosonan aki un poco mas y kico ta e acusacionnan contra e sospechosonan aki.
Franklin Abath
Sr. Abath ta ex-director di Departamento di Infrastructura y Planificacion (DIP) y tabata traha como consehero di e sospechoso principal den e caso, Sr. Oslin “Benny” Sevinger.
Caso Avestruz
Abath ta wordo acusa di falsificacion, estafa y abuso di su funcion entre januari 2014 y december 2017. Dia 28 di april 2021 Sr. Abath a keda deteni na su cas y a wordo transporta pa oficina di Landsrecherche pa interogacion. Fin di luna mei Sr. Abath a wordo laga den libertad y ta pendiente tambe pa presenta dilanti hues pa tratamento di e caso e aña aki.
Frederic “Freddy” Every
Sr. Every tabata Chief of Staff di ex-minister Oslin “Benny” Sevinger y alabes ta wordo considera un persona hopi yega na e partido politico A.V.P, specialmente Sr. Sevinger. Actualmente, segun informacion ariba Every su pagina di Facebook, e ta traha como COO na Tierra del Sol.
Caso Avestruz
Every ta wordo acusa di falsificacion, estafa, tumamento di regalo of promesa, labamento di placa y abuso di su funcion entre januari 2010 te december 2017. Sr. Every tambe a keda deteni dia 11 di mei pa interogacion tocante e caso.
