Santa Helena Chickenfarm tabata produci 90 porciento di e necesidad di webo pa Aruba y tur ta webo blanco. Pero productornan awendia ta produci e webo bruin.

“No solamente nan ta produci poco, nan ta usa galiña robes. Nan ta cria un raza di galiña cu ta come hopi y come poco. A cambio, nos tabatin un rasa di galiña cu tabata come poco y pone hopi. E ta mas economico pa e pueblo. E webo ta keda webo. Paden e ta keda igual, sea ta casca bruin of blanco. E casca bruin ta mas duro si, pero esey ta pasobra e galiña ta come mas y ta pone menos webo,” Francis Wever, experto den produccion di webo, a bisa Bon Dia Aruba.

Kico a pasa ta cu hendenan a cuminza produci e webo bruin cu ta mas costoso y esey a habri e caminda pa importa e webo bruin di afo na un prijs mas economico, y bende como local, pa gana mas placa ainda. “Atrobe, e proteccion no tabata pa proteha e empresario sino pa stimula nan pa bay den volumen pa produci mas pa Aruba. Mester tin ambicion pa keda progresa den negoshi. Si no, e empresa ta cay atras y inversion ta come tur cos. Tin e tendencia na Aruba pa aumenta e prijs di webo local y esey no mester ta e intencion. Mester bay den volume pa baha prijs di webo. Awor ta probecha di dje, y awor e proteccion ta sirbi un man yen di hende y no e comunidad en general.”

Casi mes galiña cu habitante

“Nos tabatin mas galiña cu Arubiano. Nos tabatin 96 mil galiña y como 30 mil meter cuadra di tereno,” Wever a sigui splica. E ta nifica cu mester crea espacio pa e galiñanan move y e ta maximo tres galiña pa cada meter cuadra. Diez aña pasa Wever a calcula cu Aruba tabatin espacio pa 150 mil galiña. Pues, mester tabatin 50 mil meter cuadra disponible pa cumpli cu demanda di mercado local. Y ta espacio cu ya no tin. “Ami a yega di pidi tereno na Kibaima cu tabata bashi y nos no a haya. Awor ta pio, pasobra tin yen di cas.”

Gobierno a neglisha e aspecto aki di produccion y awor numa ta bolbe riba posibilidad di produccion di webo, pasobra e nocion a bira popular.

Scol di galiña

Francis Wever a bisa cu su empressa tabata exitoso pa motibo cu el a keda inverti den conocemento, pa medio di convencionnan, tayernan internacional. “Y pa un industria ta exitoso mester di un scol di galiña.”

Un scol di galiña ta e principio cu un chickenfarm mester tin galiña di diferente edad. For di jong te na mas bieu. “E ta mescos cu un scol. Asina cu un set ta caba di pone, mester tin un otro grupo cu ta cuminza pone y tin e puyitonan cu ta yegando. Mester tin galiña di tur edad. Ora tin un chickenfarm, e productor mester sa cuanto cuminda nan ta come, mas o menos, y cuanto webo ta piki, y cuanto galiña tin cu cria tur dia.”

Pasobra un ta caba, otro ta cuminza, y e otro ta yega. Y e galiña cu ta bende na pueblo pa sopi, ya ta completamente desprecia den bukinan. E no tin balor mas como galiña cu ta produci webo y esey ta permiti cu por yuda comunidad cu cuminda barata. “Bo mester di e luga bashi, y mester sali di e galiña lihe lihe, pa asina haci e luga limpi. No por ta asina cu awor ta bende un galiña asina na 25 florin. Come on. E ley di proteccion di produccion di webo no ta pa beneficia e productornan awor cu ta apenas ta produci 10 porciento di locual Aruba mester. E ley ta pa yuda comunidad,” Francis Wever a enfatisa.