Francis Saladin: ‘Maneho sector publico mester ta balansa’

Comerciante Uni a bin dilanti pa mustra nan puntonan pa iniciativa cu gobierno ta tumando. Nan ta premira cu e situacion lo bira ‘grave, pa motibo cu ta depende di turismo y si no tin, no tin entrada’.

Francis Saladin director di Frasa a comparti cu den momento asina e punto di salida ta cu henter Aruba mester yuda carga e situacion cu tin actual y cu lo bin. “Mester bay forma un balansa pa tur hende supera e crisis” den un forma decente.

El a bisa cu e iniciativa di minister y parlamentario cu ta entregando 750 miyon ta bon, ‘pasobra nan tin cu duna ehempel prome’ mirando cu tempo ta pasando lihe y a drenta april caba.

“Awo lo mester papia cu aparato gubernamental den su totalidad pa wak kico ta bay haci. Gobierno den totalidad tin cu baha gasto. Den e momento cu e situacion escala mas, lo premira cu cosnan lo bira grave”, el splica.

Tambe a comparti cu si no drenta turismo ‘no tin entrada’, e ora gobierno tin cu wak e medida con ta bay haci cu ambtenaar pa sigui paga nan salario normal. Saladin ta expresa cu no ta husto pa un grupo di 25.000 (cu ta premira cu lo keda sin trabou) den sector priva haya 950 florin so ‘y corda di esunnan cu no ta cay den FASE, cu no lo haya nada’.

Saladin a bisa cu tin di ambtenaar cu ta ganando placa cu ta sinta na cas caba. Placa cu nan tin pa sigui gasta, pero esunnan cu ta gana menos no tin e oportunidad pa tambe haya e gusto di come locual nan kier.

E ta bisa cu ta importante pa gobierno wak kico e sector publico por entrega. “Nos no kier trapa riba hende, pasobra esey tampoco no ta e punto.” E ta duna di conoce cu e trahado den sector publico tin derecho tambe, pero tambe mester entrega algun beneficio te ora cu supera e crisis.

A puntra Saladin con e relacion ta cu otro gremionan. Segun Saladin, nan di Comerciante Uni ta diferencia di opinion pero, esey no ta nifica cu e relacion ta malo, ‘nos ta den bon relacion cu tur gremio’.

Sinembargo e ta bisa cu den dianan cu ta bin gobierno y parlamento tin cu haci pa sector publico duna di nan parti. “Nan mester ta mas creativo, manera duna tur maestro vakantie, pa asina extende scol cu dos siman, pero cu nan a haya e vakantie obligatorio.”

Tambe pa e ambtenaar cu no ta trahando actualmente oblig’e pa tuma vakantie. Pa e no ta na cas sin traha anto ta keda acumula e vakantiedagen. “E ta keda mantene cu no ta husto”, anto e sector priva no ta wak esey ta tuma luga. “No kier trapa derecho di hende, pero mester ta mas balansa so.”