Francis Saladin di Comerciantenan Uni; Pa otro aña, Aruba na nivel di turismo lo por ta bon pero cu un inflacion cu ta bay causa impacto

Aña 2021 tabata un aña yen di retonan tanto den diferente area como social, salubridad y ademas economico pa via di pandemia Covid-19, pa e motibo aki Bon Dia Aruba a acerca e comerciante Francis Saladin ken a conta con e aña aki a bay pa area comercial y kico ta e expectativanan pa otro aña.

Saladin a splica cu 2021 tabata un aña miho cu 2020 door cu a deal cu e situacion di pandemia di un manera miho na unda tin un poco mas di entendimento di e virus di e Covid-19 su comportacion y ki efectonan e tin, den aspecto aki Saladin ta kere cu Aruba a haci un bon trabou y a hiba un bon maneho na unda cu den area turistico por lo menos, “nos a logra mantene un cierto nivel di turismo cu ta nos unico pilar economico actualmente y bao e circunstancianan e tabata ok”, el a sigura.

Tocante belasting nobo ‘BTW’ Saladin a expresa cu nan a scucha cu esey lo wordo introduci pero e tarifanan actualmente no ta conoci, nan a pidi gobierno pa nan por tin participacion den esaki pa motibo cu nan a compronde di gobierno cu esaki ta bin for di reforma fiscal pero “na fin di dia hopi biaha gobierno ta implementa algo sin tene na cuenta  cu e consecuencianan cu esey por tin den practica,  e teoria ta bisa bo un cos pero den practica ta diferente y esey pa nos ta importante pa nos tin un participacion importante specialmente pa con ta implement’e y con e ta maneh’e”, el a comenta.

El a trece dilanti cu luna pasa nan a reuni cu gobierno tocante e impuesto aki y nan a informa cu nan lo wordo invita pa splica con lo maneha e BTW, e ideanan cu nan tin y con nan kier haciel’e pa asina comercio por participa y tin imput den esey, el a afirma cu nan a haya caba un acercamento di parti di Departamento di Impuesto pa cu esaki cu no tin un fecha estableci te ainda, tambe pa nan haya sa con e tarifanan lo bay ta implementa y con gobierno ta mira e implementacion.

Na e momentonan aki tin dos grupo vulnerabel den comercio na unda cu prome cu pandemia di  Covid-19 tabatin companianan y comerciantenan cu ya caba tabata presenta problemanan financiero y tabata lucha pa por sobrevivi pero, tambe ta e otro grupo di companianan cu ora e pandemia a yega nan problemanan a cuminsa pero door di e ayudo di gobierno cu tabata e subsidio di salario y banconan na cuminsamento nan a purba di mantene nan cabes riba awa pa asina warda e ora economia recupera back pa por sigui traha normal.

“Claro na momento cu gobierno a para e loonsubsidie basicamente abruptamente y memey di luna na unda nos tabata conta cu loonsubsidie te cu fin di aña, gobierno a duna di entende cu lo ta asina ey, bo ta plania riba esey y ora bo bin cu un cambio asina sin avisa y sin nada e ta causa panico, preocupacion y daño economico tambe den empresanan cu no tabata prepara p’e”, Saladin a manifesta.

Par di luna pasa, specificamente na luna di september Camara di Comercio hunto cu Comerciantenan Uni y Atia a haci un conferencia di prensa na unda nan tabata solicita gobierno pa adapta e base di calculacion di impuesto di importacion, Saladin a splica cu door di aumento di prijs di container e prijsnan ta keda aumenta constantemente y nan tabata espera cu esaki lo continua te cu siguramente mita di otro aña,  “esaki ta un situacion mundial cu nos por tin poco control riba dje, nos a manda carta pa gobierno pa wak con por alivia esaki pa cu e productonan di consumo pa yuda e pueblo di tal manera, pero nos no a haya nada di gobierno, a acerca departamento di Aduana cu supuestamente lo presenta nan informacion of analisis di kico lo por of no por pero te cu dia di awe, esey a keda den vano”, Saladin a declara.

Pa loke ta trata e perspectivanan pa otro aña, Saladin a menciona cu den aspecto turistico  nan ta wak’e di manera positivo, “e indicadornan ta mustra positivo” aunke tin actualmente e variante nobo di Covid-19, esta Omicron, cu ta causando un poco preocupacion na nivel mundial “pa nos tur un pandemia asina aki ta algo nobo dus, nos no sa ki precisamente con largo e ta bay dura pero importante ta cu gobierno sigui hiba un maneho relativamente estricto, mesun cos cu nan a bin haciendo pa cu Covid-19, pa asina sigura cu nos isla ta mantene su status pa cu e pais Merca na unda cu e mayoria di nos turista ta bin for di eynan, pa asina ey nos por sigui haya turistanan, mi ta kere esey lo yuda hopi pero te ainda e inflacion actual cu tin ta algo cu ta bay impacta nos tur na tur nivel y esey ta algo cu te ainda nos no ta sintiendo full efecto di dje te otro aña, lo tin un aña cu por ta na nivel di turismo lo ta bon pero cu un inflacion cu ta bay causa impacto”,  el a afirma.

El a comenta cu Aruba na e momentonan aki tin un inflacion di “dobel digit” na unda cu ta mustra mas o menos cu tin un 12 of 15% di inflacion, segun Saladin a sigura.

Pa finalisa, Saladin a trece dilanti cu pa nan ta hopi importante mirando cu pais Aruba  “ta di nos tur, ta hopi importante pa gobierno tene na cuenta cu diferente stakeholders, nos no t’ey solamente pa critica gobierno of pa bringa cu nan, nos kier traha den cooperacion y yuda nan pasobra na fin di dia ta nos pais e ta, nos tur hunto mester busca pa sali for di e situacion aki y busca solucionnan duradero cu por contribui pa cu nos tin un futuro mas miho”.