Francis Saladin di Comerciantenan Uni: “Aña 2023, lo ta positivo pa turismo, pero por ta un tiki menos placa pa gasta na Aruba”

Francis Saladin di organisacion Comerciantenan Uni den un entrevista cu Bon Dia Aruba a expresa cu 2022 tabata un aña cu a cuminsa un tiki mas keto, pero a bin ta progresando den transcurso di aña, unda a bay hopi bon danki na turismo cu a yuda pa economia por recupera.

Pero e ta mira e diferencia compara cu 2021 unda turista no tabata gasta mas compara cu e aña aki pa motibo cu aña pasa tabatin loke ta yama “Revenge of Travel” revancha di biahamento, cu despues di pandemia di Covid-19 hendenan por a spaar y haya placa di Gobierno Mericano, “aunke e aña aki tabata un tiki menos cu aña pasa den e aspecto total”, Saladin a señala.

Esey tambe ta lo cual nan ta premira como comerciantenan pa aña 2023, positivo pa turismo pero por ta un tiki menos placa pa gasta pa cu Americano unda Merca tambe posiblemente lo ta drentando den un recesion, costo di bida tambe a subi na tur caminda rond di mundo y no na Aruba so, sinembargo, e otro aña pa Aruba ta bay ta mas dificil door cu costo di bida ta bay subi mas.

“Aunke gobierno haci algo pa toch purba mantene gastonan abao di entre otro Web cu Elmar pa baha nan tarifanan back y cumpli cu nan promesa cu tabata seis luna so lo a subi e tarifanan, ambos, pueblo y comercio ta depende di e decision ey di gobierno y un promesa pa bah’e back”, el a señala.

Pa lo cual ta trata e reforma fiscal cu gobierno ta papia di dje “lastimamente ningun rato el a bira un reforma, gobierno ta papia cu a sinta cu gremionan, esey ta berdad pero, e realidad tambe ta cu no a sinta cu gremionan suficiente, no a tene na cuenta cu tur e punto cu gremionan a trece dilanti na unda cu gobierno ta opta pa sigui mantene su gastonan halto y ta subi e belasting”, el a bisa.

Tin cierto compensacion pero si ta wak e gastonan extra cu ta bay bin, e costonan ta bay subi y en general e compensacionnan no ta bay cubri e extra gastonan ey, ni na nivel di pueblo ni na nivel di comercio “e ta un oportunidad cu nos a perde e aña aki di por echt a traha riba introduci un reforma fiscal, a wordo papia di un introduccion di un BTW, pero mi ta kere cu problema ta ora gobierno a lansa e BTW a sali cu un tarifa di 18%, spanta tur hende en bes di cuminsa cu un tarifa mas rasonabel y asina ey si bo ta introduci un BTW bo no tin un sistema cu ta bay keda funciona pa añanan largo, awor a opta pa subi e BBO na 7% cu na comercio ta bira 7.5% pasobra BBO bo ta pag’e riba BBO cu tambe nos a puntra pa elimina esey na unda e 7% ta gewoon riba nos prijs”, Saladin a comenta.

Den su pensamento un 7% ta haci’e mas dificil pa e comerciantenan local cu ta rebende e producto ademas riba hendenan pa por importa directamente e producto y asina evita e BBO “pero pa cu esey, gobierno a bin aworaki cu un BBO na frontera, lo cual ta un poco straño pasobra e ta un tipo di invoerechten y atrobe tur esaki, lo por wordo evita door di introduci un BTW”.

Dia 1 di januari ta e dia cu Plan di Impuesto 2023 lo wordo implementa manera bira conoci cu varios cambio den leynan di impuesto, Saladin a menciona cu cada compania ta diferente unda tin algun cu por ehemplo, supermercadonan cu tin hopi articulo, pa nan ta hopi dificil pa motibo cu nan tin hopi articulo “pa nan cu a caba di cambia e sistema di prijs y awor atrobe na januari bo tin cu bay cambia tur bo prijsnan cu e 1% aki, e ta hopi trabao innecesariamente, mientras cu si cambia e sistema di BTW e ta bira hopi mas facil”.

Ademas, el a trece dilanti cu minister di Finanzas Xiomara Maduro a bisa cu comercio ta mal informa e consumidor “pero lastimamente e ta esun cu ta manipula e consumidor, pone kere como si fuera cu ta comercio mester paga e BBO, mientras cu BBO ta un tax indirecto, berdad ta cu bo ta pag’e riba benta pero hamas y nunca ningun comerciante por paga 6% of awo 7% riba su benta sin incluie den e prijs, e ta un forma eroneo y manipulativo di tilda e pueblo contra comercio como si fuera cu nos ta gana masha hopi placa mes y asina por contribui cu e 7% ey como un extra gasto di empresa”.

Saladin a comenta cu e ta kere cu ta importante pa hendenan cuminsa di nan banda tambe vocifera nan disgusto pa e perdida di oportunidad di gobierno di introduci un reforma fiscal cu ta beneficioso y duradero pa Aruba, “en bes di cada rato den un forma abrupto ta keda subi impuestonan, nos ta compronde cu nos tin un debe di paga back pa Hulanda pero nos tur tin debe di un manera of otro, sino ta pasobra hende tin debe di prestamo personal of compania tin prestamo comercial, un gobierno tin prestamo gubernamental, gobierno ta sigui subi prijs y ta tilda di comercio subi prijs pero nan ta esun cu ta subi belasting, e ora ey e trahado tambe kier mas salario loke ta subi costo operativo di empresanan y e ta keda un ciclo vicioso”, el a finalisa.