Aña 2020 ainda ta un aña cu a trece hopi reto debi na pandemia di Covid-19 cu a sorprende henter mundo. Aworaki tin cu enfoca riba loke 2021 por trece cune y con comerciantenan ta prepara pa esey.

Durante un entrevista cu Bon Dia Aruba a haci cu Francis Saladin di Comerciantenan Uni, el a trece dilanti cu 2020 tabata un aña hopi dificil. Tambe el a afirma cu su compania ta bende cuminda, y ya cu pa motibo di Covid-19 no tabatin turista na hotel of clientenan na restaurant, nan benta a cay drasticamente.

Ademas, el a señala cu no ta solamente e caida di benta a causa problema, sino hopi producto cu no por a wordo bendi a keda manera ‘placa para’, productonan cu na fin di dia nan a mester a entrega como donacion pa motibo cu no tabatin benta pa nan. Tambe nan cliente cu ta HORECA door cu nan no tabatin benta, nan no por paga nan cuenta y tambe por considera esey como placa para.

December ta un luna cu pa comerciantenan e mayoria di biaha ta hopi druk, aunke e aña aki tabata uno distinto. Saladin a expresa cu e pronosticonan pa e luna aki ta dificil, pero te na e momentonan aki e ta mustra un poco miho. Pero e realidad ta cu e incertidumbre di kico ta bay pasa y si gobierno ta tuma medidanan un biaha mas, “mi ta kere cu na fin di dia e hende ta den ambiente di fiesta, ya cu casi henter aña nan a keda cera y nan kier sali.” Den e aspecto aki el a menciona cu tambe turistanan ta yegando, aunke segun el a lesa, a pronostica cu e luna aki no ta e miho scenario.

Pa otro aña 2021, e ta sigura cu te ainda ta existi hopi incertidumbre, pero e ta kere cu lo bay ta miho compara cu 2020, mirando cu mundo henter tambe lo kier sigui bay dilanti, turistanan tin gana di biaha y bin Aruba. “E beneficio cu nos tin ta cu nos ta cerca di Merca y ainda akinan nan ta sinti mas sigur.” Sinembargo por wak cu cruceronan ya caba a pospone nan fecha di embarque y no tin duda cu esey lo por wordo posponi atrobe, si mester te temporada di zomer, Saladin a comenta.

“E ta bay ta miho cu aña 2020, nos ta positivo cu esey” Saladin a afirma.

Na e momentonan aki, casonan positivo di Covid-19 na Aruba ta aumentando. Pa cu esaki Saladin a bisa cu e no tin suficiente informacion pa compronde dicon e casonan ta den aumento, di unda ta hayando e casonan, e ta algo cu ta pasando na cas, na unda cu hendenan ta aglomera. E por ta pasando riba caya of e ta pasando den area di deporte, “esey mi no sa,” pero door cu gobierno a flexibilisa diferente aspecto, Saladin no tin idea con esey ta tumando luga. Segun e, esaki ta un parti importante pa por detecta kico ta e causante di e aumento di casonan pa e ora ey por atende cune.

“Ta un lastima ora bo ta tende con restaurantnan ta cumpli cu e reglanan y e comportacion di hende den restaurant ta manera mester ta, pero mi no ta compronde pakico tin cu castiga nan pa cu esaki”, Saladin a expresa.

Di loke a sucede algun dia pasa, e situacion di un luga di benta di kerstboom unda hende a aglomera. Mirando e situacion cu Aruba ta den dje, Saladin a declara cu di su banda e ta algo comprendibel, pa motibo cu aunke Aruba ta den crisis, no tin nada otro pa e hende por sinti bon como e temporada di Pasco. “Si henter aña caba tabata dificil, hende tabatin limitacion pa hopi cos, mi ta kere cu esaki ta un cos cu hende kier disfruta y sinti e ambiente den sentido di Pasco den nan cas.”

Tambe el a agrega cu aunke tin un crisis financiero y economico, tin hende cu ta bisa cu den situacion ey e placa ta wordo malgasta. Pero e realidad ta keda cu si ya como humano e ciudadanonan a wordo limita den diferente aspecto, nan kier comparti cu famia y amigonan nan sentimentonan. “Sikiera mi kier sinti algo positivo. Esaki ta mas un reaccion di positivismo y no tanto un iresponsabilidad, aunke na final el a keda como cierto iresponsabilidad, pero nos ta keda hende”, Saladin a comenta.

Pa finalisa, el a trece dilanti cu mas importante ta cu gobierno mantene e bon trabao cu nan ta bin ta haciendo pa cu e maneho di Covid-19. E ta aplaudi e grupo cu ta tuma e decisionnan necesario y adaptando nan debidamente segun e situacion.

Mirando Aruba compara cu Corsou, cu a habri un december cu medidanan na cantidad cu ta bay afecta nan economicamente y gravemente, Aruba ta den un situacion cu ta hopi mas avansa na unda cu a drenta na un december cu e negoshinan por draai y cu comerciantenan por produci placa, ademas cu tin turismo riba e isla cu ta crea un sensacion positivo den e ambiente economico.