Presidente Frances, Emmanuel Macron ayera a anuncia medidanan cu intencion di combati extremismo Islamico na Francia, dunando gobierno mas autoridad riba educacion di mucha, financiamento di moskee y training di imam.
Macron, durante un bishita na ciudad di Mulhouse den oriente Frances, a bisa cu gobierno a busca pa combati ‘interferencia stranhero’ den e forma con ta practica Islam y e forma con su institucionnan religioso ta organisa den e pais secular.
“E problema ta ora den nomber di un religion tin persona cu kier separa nan mes for di e Republica y asina no respeta su leynan”, el a bisa.
Macron a bisa cu e tin plan pa caba cu un programa crea na 1077 cu a permiti nuebe pais manda maestro na Francia pa duna les di lenguahe y cultura stranhero sin supervision di autoridadnan Frances.
Cuatro pais di mayoria Musulman – Algeria, Tunisia, Maroco y Turkia – tabata involucra den e programa, cu ta alcansa alrededor di 80mil studiante cada aña.
Macron a bisa cu awo Francia lo tin a cambio acuerdonan bilateral cu otro nacionnan pa sigura cu estado Frances tin control riba e cursonan y nan contenido, cuminsando na september.
E lider Frances a bisa cu ta preparando un ley nobo pa provee transparencia den con ta financia moskee. Macron a bisa cu a pidi Conseho Musulman Frances (CFCM) pa mehora e training di imam na Francia. El a bisa cu e practica di permiti Algeria, Maroco y Turkia pa manda imam na Francia lo descontinua.
“Moskeenan financia cu transparencia cu imam cu a train na Francia y ta respeta e balornan y principionan di e Republica, asina nos lo crea e condicionnan pa musulman na Francia por practica nan religion libremente”, Macron a bisa.
Macron a bisa cu e unico pais cu cual Francia no a yega na un acuerdo riba e medianan nobo ta Turkia. “Turkia awe por haci e escogencia di sigui riba e caminda aki cu nos of no, pero mi no lo permiti ningun pais stranhero pa alimenta separatismo cultural, religioso of relaciona cu identidad riba suelo di nos Republica”, el a bisa.
“Nos no por tin ley Turco riba suelo Frances. Di ningun manera”, Macron a agrega.
