Francia a experimenta otro fin di siman di violencia di protesta di e asina yama “jacketnan geel”, e di diescuatro consecutivo, den cual tabata teme cu a pesar cu e mobilisacion a bira menos, cu e violencia di e enfrentamento cu polis lo no mengua.
Rond di merdia e prome enfrentamento cu polis a cuminsa, cu a uza gas lagrimogeno pa core cu e manifestantenan.
Diadomingo pasa a cumpli tres luna cu e movimento a cuminsa cu nan accionnan riba caya, cu exigencia pa loke ta recuperacion di poder di compra y di denuncia di e politica di presidente Macron. Den e accionnan di diasabra y diadomingo tabatin como 20 diferente ciudad envolvi.
Na Paris a lansa varios convocatorio pa “insureccion” y pa blokia Place de l’Etoile, unda e Arc de Triophe ta situa, na final di Champs Elysee.
Segun cifra di ministerio di Interior, e protestanan den ultimo simannan no solamente ta leu di e cerca di 290.000 persona cu a reuni den e prome edicion dia 17 di november na henter e pais, sino cu nan a sigui perde forsa den cantidad di hende reuni.
Di acuerdo cu e ministerio di Interior, dia 9 di februari a sali riba caya como 51.400 manifestante, compara cu 84.000 dia 12 di januari. No obstante, e “jacketnan geel” ta rechasa e datonan ey y ta afirma cu diasabra pasa nan a reuni 118.200 manifestante na e protestanan.
E instituto Elabe a haci un sondeo publica siman pasa diaranson, unda ta señala cu pa prome biaha tin un mayoria (56%) cu ta desea pa e movimento termina. Pa 64 % di e encuestadonan, e manifestacionnan a aleha nan mes di e exigencianan popular inicial.
