Diahuebs ultimo prome minister demisionario Evelyn Wever-Croes a duna un splicacion na Parlamento di Aruba tocante con e situacion ta y con negociacionnan ta andando relaciona cu e Rijkswet. Partidonan di oposicion, PPA y AVP a expresa nan posicion pa loke ta e continuacion di negociacion riba e Ley di Supervision aki.

Lider di fraccion PPA, Otmar Oduber, a indica cu a pesar cu e encuentro publico informativo, su fraccion a expresa su preocupacion manera ya caba e parlamentario a bin ta indica.

El a indica cu mirando e declaracionnan di prome minister, desde 2020 Aruba ta den un negociacion continuo pa loke ta trata e Rijkswet aki y a pesar di tur e obstaculonan, el a menciona, gobierno a haci un esfuerso pa Aruba yega unda e ta awe, cual ta un progreso compara cu 2020.

Sinembargo, Oduber a indica, falta menos di tres luna, despues di cuater aña ta negosha cu e situacion actual, pa e yega e fecha deadline pa e negociacionnan aki.

El a indica cu ta dificil pa puntra parlamento tocante nan pensamento riba un Rijkswet nobo si nan no sa e contenido di dje, pero na mesun momento el a señala cu no tin suficiente tempo pa warda cada biaha pa e siguiente reunion adecuado pa parlamento duna su opinion.

El a agrega cu ademas a caba di sali di eleccion dos luna pasa caminda tur partido a expresa kico ta nan posicion riba e tema aki hopi duidelijk.

Oduber a subraya cu fraccion PPA ta hopi cla den nos posicion y no ta acepta e Rijkswet cu e contenido cu e tabatin, aunke el a indica cu ta un alivio cu esaki a ser elimina. Pero el a agrega cu esaki ta yena PPA cu mas preocupacion cu falta tres luna pa e fecha deadline y parlamento no sa ainda kico e contenido di Rijkswet nobo ta pa por discuti esaki den parlamento.

“E posicion di nos fraccion ta hopi cla, nos ta sostene loke parlamentonan anterior vota pe… 18 di e 21 parlamentario a mustra riba e hecho cu nan no ta di acuerdo e tempo ey na 2022 y a sostene e intencion di normanan cu nos ta fiha cu tin den nos propio leynan local,” el a resalta.

Oduber a splica cu PPA ta kere tin espacio pa Aruba usa su propio leynan local pa expande e normanan cu ta ser determina den parlamento, hinca nan den e leynan local cu mester crea y duna e garantia na Hulanda riba e posicion cu parlamento ta pone pa gobierno expresa na Reino.

Parlamentario Oduber a expresa tambe cu, saliendo for di posicion di fraccion PPA, nan no ta confia Den Haag y no ta kere den e politica di Den Haag pa loke ta e actitud cu nan tabatin pa cu Aruba, no di awe pero pa hopi tempo caba.

El a sigui indica cu fraccion PPA ta kere cu no por warda y confia y kere cu por bay depende riba loke IMF ta trece dilanti pa Aruba no encontra su mes den un situacion di lomba contra muraya prome cu fin di april cu un Rijkswet cu no ta ser acepta y toch Hulanda “ta bay pone nos guli manda abou algo cu nos no ta prepara pe”, el a resalta.

Parlamentario Oduber a resalta cu PPA a bin cu e pensamento di frente nacional y ta pensa cu parlamento mester ta un sosten, sin importa ken ta gobierno.

Anteriormente el a haci caba un yamada di sinceridad y obhetividad na e politiconan y a enfatisa cu ya no ta importa ken ta pro of contra, segun el a remarca, no tin otro opcion.

Esaki ta e mesun sentimento y posicion cu el a expresa den e carta cu a manda Presidente di Parlamento. “E tempo ta awo pa nos por forma un Frente Nacional, entre tur partido politico, gremionan y instancianan local pa fiha un posicion comun y negocia ainda cu gobierno di Hulanda pa un avenida mas husto, sin discriminacion y respetando e derecho autonomo cu Aruba tin y pa cual a tuma decadas di lucha y sacrificio di e mesun pueblo Arubano, mediante practicamente tur partido politico ainda existente, manera AVP, PPA y MEP, y claro awe cu” participacion di partidonan nobo manera Futuro.

“Ta keda na nos madurez politico awe, pa mustra y convence Hulanda cu e constelacion nobo aki di Parlamento por tin alternativanan real y convincente pa logra, mediante nos gobierno aki na Oranjestad, e mesun meta cu ta wordo desea, pero sin tin cu sacrifica e lucha y derecho obteni, mediante nos Constitucion.

AVP Mervin Wyatt-Ras.

“Tempo ta esencial y un tema asina crucial y determinante pa e futuro di nos pais no por warda, y cada dia cu pasa lo pone nos Parlamento y nos futuro gobierno su lomba contra muraya. Ban mustra un diferencia y responsabilidad pa cu nos comunidad, unda kier bolbe haci un suplica riba su persona pa yama e reunion publico aki mas pronto cu ta posible, invitando asina gobierno y esnan encarga cu e tema aki,” el a finalisa su carta.

Partido AVP, aunke durante temporada di eleccion y den constelacion anterior di Parlamento di Aruba a vocifera cu nan ta contra e Rijkswet, durante e encuentro publico, a pesar cu prome minister demisionario a puntra e fraccionnan kico ta nan opinion pa cu e Rijkswet, no a expresa formalmente nan posicion.

Parlamentario y vice presidente di Parlamento, Mervin Wyatt-Ras, a indica cu pa motibo cu tabata un encuentro publico informativo esey tabata e momento pa expresa nan opinion riba e situacion.