Parlamentarionan di fraccion MEP Hendrik Tevreden, Edgard Vrolijk y Shailiny Tromp-Lee a manda un carta pa presidente di parlamento, Gerlien Croes, pidiendo un reunion publico pa trata e ley di minimumuurloon.

Den e carta cu fecha di 17 di januari 2025, e parlamentarionan ta splica cu desde final di 2024 e ley pa introduci un minimumuurloon ta cla pa ser trata y ta pa e motibo aki fraccion MEP ta haci peticion na e presidente di parlamento pa yama un reunion publico, invitando e minister encarga, pa trata e ley aki den Parlamento di Aruba.

E ley di minimumuurloon mester a ser introduci ya caba, dia 1 di januari 2024, pero esaki no a sucede. Despues cu esaki no a tuma luga a indica cu lo haci un introduccion simbolico dia 1 di mei 2024, cual tampoco a tuma luga. Gobierno a cay, aña 2024 caba, un constelacion di parlamento nobo a huramenta y ainda not in bista riba introduccion di e ley aki.

Na juli ultimo ex parlamentario di partido RAIZ Misha Raymond a trece dilanti e topico di minimumuurloon y a cuestiona cu ki seriedad ta tumando esaki y pakico introduccion di el ey aki ta tardando asina hopi.

Minister di Labor e tempo ey, Glenbert Croes, a subraya cu nan ta tuma e introduccion di minimumuurloon hopi na serio.

E aworaki ex-minister di Labor a splica cu e trayecto di e ley di minimumuurloon a cuminsa 11 di december 2023 ora cu e nota tocante e introduccion di un minimumuurloon a keda cla y el a presenta esaki na Conseho di Minister pa aprobacion.

El a sigui splica cu dia 15 di december 2023 Conseho di Minister a aproba e propuesta di e introduccion di minimumuurloon. El a agrega cu den e documentacion tin un nota di estado di e comision minimumuurloon tocante cu e fecha di introduccion tabata premira pa 1 di januari 2024 manera cu a compromete cu parlamento y comunidad, pero no por a cumpli cu esaki.

Dia 10 di januari 2024, el a indica cu su persona, ta manda un nota pa Conseho di Minister y na DWJZ cu peticion pa cuminsa cu e trayecto di legislacion di e ley di minimumuurloon.

Riba dia 14 di maart 2024 el a pidi conseho na Sociaal Economische Raad (SER). E status riba esaki, Croes a informa e tempo ey, ta cu Sociaal Economische Raad a duna un notificacion cu pa mas tarda 2 di juli 2024, nan lo ta cla cu nan conseho pa por manda esaki pa DWJZ.

Pa loke ta DWJZ, el a indica cu e departamento a informa cu nan ta trahando riba e landsverordering minimumuurloon pa algun tempo caba y ta spera cu nan lo finalisa e concepto prome cu reces di parlamento. El a agrega cu esaki den reserva di e conseho di Sociaal Economische Raad cu su posibel consecuencianan pa e concepto y e memorie van toelichting.

Na Aruba, salario minimo ta ser stipula como un suma pa luna of un suma semanal. Sinembargo, legalmente un siman ‘completo’ di trabou por consisti di 40 pa 45 ora pa siman. Esaki ta significa cu un persona cu ta traha 45 ora pa siman por wordo paga mesun suma total di salario minimo, cu esun cu ta traha 40 ora pa siman. E resultado di esaki ta cu esun cu ta traha mas ora, ta cobra menos pa ora. 

No ta un secreto cu costo di bida en general a aumenta na Aruba, locual ta afecta un gran mayoria di ciudadanonan cu ta rek nan salario tur luna pa esaki por yega y cubri tur nan necesidadnan. Ta spera cu e introduccion di un minimumuurloon por tin un impacto positivo den e cartera di e clase trahado.