ORANJESTAD – Ta increibel con hamber y sed pa poder por hiba un lider politico manera Mike Eman – kende despues di e resultado di e eleccion di 2017 a traiciona su casi 8000 votadonan door di nenga su asiento den parlamento – na un locura total ya cu awe e ta na grito atrobe y e biaha aki organisando hunto cu su partido AVP un manifestacion supuestamente nacional y den cual e ta exigi pa un eleccion nobo y esaki despues di apenas 1 aña y mey cu pueblo ya a bay urna electoral.

Historia di e 28% di electorado
Sinembargo e memoria di Mike Eman un biaha mas a cay hopi cortico ya cu historia ta comproba cu desde 1986 nos pais a conoce 10 gobernacion di diferente signatura politico tanto di MEP como di AVP y 9 di e gobernacionnan aki tabata tin un sosten di un mayoria democratico y legitimo den Parlamento.

Pero locual Mike Eman no ta splica pueblo ta cu e unico gobernacion cu no tabata tin un sosten legitimo y democratico tabata gabinete Henny Eman 1 y di cual e tabata e consehero principal. Hecho ta cu di e 11 miembronan di Parlamento cu tabata sostene gabinete Henny Eman 1 na 1987, 4 di nan tabata independiente kendenan a bandona y bay cu e asientonan di PPA y PDA. Pues PPA y PDA cu legalmente a participa na eleccion di 22 di november 1985 no tabata representa mas den parlamento. Cu esaki tambe gabinete Henny Eman 1 a keda cu sosten di solamente 28% di e electorado Arubano. Un hecho tristo y bergonsoso den historia politico di nos pais!

Un gobierno di AVP ilegitimo y inmoral
E situacion cu a surgi aki tabata sumamente anti democratico y frustrante y ta p’esey partido MEP e tempo ey – despues di 1 aña y mey di existencia di Gabinete Henny Eman 1 – a organisa un accion di firma caminda a logra acumula 14578 firma cu a ser entrega na gobernador Tromp caminda a exigi eleccion nobo.

Tambe a organisa un manifestacion masal exigiendo pa gabinete Henny Eman baha di inmediato y proclama eleccion nobo. Pero e gobierno di AVP di un forma inmoral no kier a baha corda pa nan proclama eleccion nobo y nan a sigui goberna ilegalmente te cu fin di 1988 y cu pueblo despues a core cu nan den e eleccion di 6 di januari 1989.

Awe na 2019 e situacion ta completamente otro ya cu nos tin un gobierno democratico y legitimo gabinete Wever-Croes forma pa MEP, POR y RED cu a haya sosten di 12 asiento solido y cual ta un situacion leu di loke a tuma luga durante e gobernacion bergonsoso di AVP di 1986 pa 1988. Pues Mike Eman mester cuminsa realisa cu locual e ta exigiendo ta un locura total ya cu eleccion nobo no ta un punto di discusion na e momento aki ya cu pueblo a papia idioma cla caba apenas un aña y mey pasa.