Dialuna ultimo, dia 10 di october, fraccion di MAS, esta parlamentarionan Marisol Lopez-Tromp y Aquanette Gunn a manda un carta na presidente di Parlamento, Edgard Vrolijk pa solicita informacion riba e investigacion di Centrale Accountantsdienst (CAD) riba Arubahuis.

E carta ta bisa lo siguiente:

“Solicitud pa hallazgonan di investigacion di Centrale Accountantsdienst (CAD) riba Arubahuis

Apreciable meneer Vrolijk,

Mediante e carta aki mi ta pidi bo atencion pa lo siguiente:
Prome minister, Sra. Evelyn Wever-Croes a indica varios biaha (durante conferencia di prensa y reunionnan publico) cu CAD tabata investigando posible iregularidadnan den Arubahuis.

Mientras tanto nos a tuma nota di e articulo titula: “Manera premira: Guilfred Besaril a anuncia su retiro como minister Plenipotenciario na Hulanda”. Saliendo for di e decision abrupto di Minister Plenipotenciario Sr. Guilfred Besaril, nos kier ricibi e hallazgonan di e rapport aki di inmediato y cortes pero urgentemente ta solicita pe Prome Minister manda esaki na parlamento.

Bo cooperacion den esaki ta altamente aprecia.”

No por duna tempo fiho ki dia por informa Parlamento

Na september, prome minister Evelyn Wever-Croes a contesta e pregunta tocante e investigacion cu tabata den proceso den un comunicado di prensa. Prome Minister a enfatisa: “E investigacion ta andando y ta ami mes a pidi e investigacion y ami lo informa Parlamento tambe”.

Prome Minister a duna di conoce cu el a haya informacion cu den curso di luna di september, e partinan

di e conseho rond di e investigacion ta keda cla y e ora lo por cuminsa tuma pasonan cu mester tuma. Mientras tanto, Prome Minister a indica cu a trece cambionan tambe inmediatamente na Arubahuis pa asina por tin e siguridad cu tur cos cu ta sosodiendo ta sosode na forma corecto.

“Mi no por duna un tempo fiho pa ki dia por informa Parlamento. Mi kier ripiti locual mi a yega di bisa mas di un occasion. E no ta prudente pa duna informacion prematuramente pasobra lo por daña e investigacion. Si mi daña e investigacion mi por wordo tilda di un banda bisando cu mi a hacie pa yuda hende y di otro banda bo ta wordo tilda cu bo ta perhudica hende. Den casonan asina bo tin cu laga e investigacion cana su curso, nos a trece cambionan caba cu mester wordo treci pa evita cualkier cos cu por bay malo den futuro”.

Y siman pasa, dia 5 di october ultimo, den un comunicado di prensa Partido MEP a reitera e posicion di Wever-Croes.

“Partido MEP a tuma nota cu un biaha mas Parlamentario Marisol Lopez-Tromp no por funciona y sigui haci su trabao mientras cu investigacionnan di Arubahuis no keda cla. Mientras tambe cu varios biaha Prome Minister di nos pais a splik’e cu e investigacionnan na Arubahuis ta biniendo cla y enfatisando cu manera e investigacionnan ta cla, Prome Minister mes lo anuncia esaki.”

Tardando demasiado

“Mi ta haya e cos aki hopi erg”, Lopez-Tromp a comenta. “Pasobra pa cualkier wissewasje ya caba bo ta haya hende den problema den e dienstnan, wak loke nan a haci cu Liesje na Staten, cu no tabatin niun motibo, anto bo ta haya bo den ful un investigacion. Anto akinan bo tin hendenan di MEP cu ta haci desaster anto tur cos tin cu wordo tapa y scondi pasobra ta su cartera?” el a comenta.

Manera Bon Dia Aruba a reporta na maart di e aña aki, cu griffier di Parlamento, Arminda (Liesje) Khemlani a haya un carta sorpresa di prohibicion pa drenta edificio di Parlamento. Un persona cu tin hopi aña haciendo e trabao aki bao di diferente gobernacion. A inform’e cu e prohibicion di entrada aki ta relaciona cu posibel actonan politico cu el a haci cu ta un conflicto di interes cu su trabaonan como ambtenaar di Griffie di Staten.

Tocante e investigacion na Arubahuis, Lopez-Tromp a comenta: “E ta tardando demasiado, y mi tin e indruk cu CAD lo ta cla. Aworaki ta bezig cu DRH riba e mesun tema. Mientras tanto a cuminsa “reorganisa”… nos niun no a wak ningun advies, [Wever-Croes] si a wak nan. Dus kico ta e proposito?” Segun Lopez-Tromp, ta abnormal cu for di mita juni ta bisando cu rapport ta bin. Anto por ta berdad cu e tema ta delicado, pero tur sorto di investigacion cu ta toca hende ta delicado. “Awor den e caso aki el a hasta sigui cu e candidato riba su lista, tur cos a sigui normal, anto awo cu tin hallazgonan cu ta saliendo for di un ex-partner rabia di coalicion, dicon e keda keto.”

Segun Lopez-Tromp, a base di e rapport di CAD, cu ta basa riba hechonan, por bin consecuencianan penal.
“Pero mi ta bet bo cu e ta hink’e bao di cualkier cos pa hustifica loke por a pasa. E ta tardando mucho hopi.”
Ademas, e ta haya cu e actitud di prome minister Wever-Croes no ta consistente. “Mi ta wak e con e ta acosa tur hende, purba haya cos riba tur hende, susha tur hende nan nomber. Anto cu ta nan mes, un lugar cu ta cay bao dje, e ta kattig y vinnig y ta ataca cada bes cu toca e tema”, Lopez-Tromp a finalisa.