Fraccion di POR cla pa di dos tanda di reunion cu minister Lopez-Tromp: “Nos ta cla pa e di dos tanda di reunion manera cu e documentonan cu nos a pidi yega”

Ayera mainta, fraccion di partido POR conforma pa Alan Howell y Dellanire Maduro a ofrece un conferencia di prensa, den cual nan a trece dilanti varios topico. Entre nan e lista di pashentnan cu Covid-19 cu fin di siman a keda publica pa comunidad, y tambe e di dos tanda di e reunion pendiente cu minister Marisol Lopez-Tromp.

Howell a cuminsa papiando di e incidente cu a sucede fin di siman ultimo, na unda a keda conoci un lista di pashent afecta cu Covid-19. Segun el a expresa, te ainda no ta existi un claridad tocante con por ta posibel cu un lista di e tipo aki por a leak.

Tocante e lista, Howell a expresa cu el a compronde cu tin nombernan cu a sali dobel, tambe cu algun di e personanan cu nan test a sali negativo ta aparece den e lista aki y cu tin algun informacion cu ta cuadra y otro cu no.

Howell a sigura cu tin asina hopi informacion, cu fraccion di POR a entrega un serie di pregunta na minister di Salud, Dangui Oduber pa asina e por responsabilisa su mes, cu e por contesta e preguntanan y asina nan por haya claridad di kico a pasa den caso aki, cu el a menciona cu ta ‘lamentabel’.

“Nos tin confiansa den nos sistema hudicial, cu pronto nos por tin un resultado di con, ki ora y ki dia e persona a leak e lista ey”, Howell a sigura.

Di mesun manera, el a declara cu e hecho aki ta un berguensa y no ta algo bunita pa e pais ni tampoco pa e Departamento di Salubridad. Di loke ta trata e tipo di castigo cu e persona cu a publica e lista por haya, Howell a contesta cu e persona aki por haya un castigo disciplinario of loke un hues por dicidi, pero cu su persona como parlamentario lo laga esey pa Ministerio Publico dicidi.

Di loke ta trata e di dos ronda di reunion den parlamento cu minister di Infrastructura, Marisol Lopez Tromp, Howell a manifesta cu ta decision di presidente di parlamento, Ady Thijzen pa eligi e fecha di ki dia esey lo sigui. Ademas, a bisa cu esey no ta coresponde pa su persona ni pa un fraccion di parlamento.

El a sigura ta cu despues di e reunion ultimo, nan a dicidi di manda un carta pa presidente di parlamento pa prome cu di dos tanda sigui, nan lo desea di haya documentonan di loke minister Lopez-Tromp a trece dilanti, cu den su concepto ta trata casonan di corupcion. Di esaki el a comenta cu te ainda nan no a haya e documentonan aki.

“Nos kier haya e documentonan pa wak si loke e ta papia ta cuadra cu berdad y fraccion di POR ta cla pa e di dos tanda manera cu e documentonan yega”, Howell a declara.

Minister Lopez-Tromp a duna di conoce den e prome reunion hopi informacion y a trece preguntanan cu segun Howell, fraccion di POR no por a contesta. “Esey pa nos a cay manera un sorpresa.” Tambe nan a pidi pa e momento cu di dos ronda cuminsa, tur minister mester ta presente, pa motibo cu si minister Lopez-Tromp ta papia tocante un ministerio, su representante mester ta den parlamento pa defende su mes.

Di su parti, Dellanire Maduro, lider di e fraccion a expresa tocante e lista di personanan contagia cu Covid-19 cu ta importante pa haya sa di gobierno si ta trata aki di si e informacion a sali internamente, of si e programa cu e departamento ta usa a sufri di un atake di un hacker.

Dia 11 di augustus su persona a manda diferente pregunta pa gobierno pa asina ofrece informacion tocante aumentonan di casonan di Covid-19, pero te ainda nan ta wardando un contesta di parti di expertonan, cu ta esunnan cu por duna un contesta riba esey.

Di mesun manera, el a declara cu tambe a entrega otro lista di pregunta. Mirando cu fecha di habrimento di scol a keda posponi pa dia 3 di september, pa asina nan por tin un miho entendimento como parlamento di con e Crisis team ta hinca den otro, e organograma di e diferente tipo di cluster, expresando cu su persona lo desea di haya mas claridad y compronde con e decisionnan y consehonan ta wordo tuma.

Mirando e reto mundial cu enseñansa tin aworaki, enseñansa digital ta uno cu mester di atencion y pone e maximo esfuerso den esey.

Maduro a informa cu dia 14 di augustus a presenta e adaptacion di un decreto cu ta trata e ley cu ta encera con un persona ta registra of reconoce como dunado di cuido, ya cu den otro paisnan como por ehempel Merca, ta reconoce mediconan di otro pais.

Di esaki, ta importante cu na henter mundo y den henter carera por tin personanan cu a gradua cu titulonan y cu tin cu percura cu nan titulo ta di calidad.