ORANJESTAD – E situacion di ilegalnan y pidimento di asilo tin pueblo hopi preocupa. Fuera cu pueblo ta preocupa e tema su mes ta basta controversial y confuso.
Parlamentarionan di POR traves di presidente di parlamento, a haci uzo di nan derecho pa invita minister di Husticia pa acudi na parlamento den un openbare bijeenkomst (encuentro publico) pa duna splicacion y cuenta tocante e situacion reinante. E parlamentarionan tambe ta desea di scucha cual ta e accionnan di parti gobierno pa trece trankilidad den corto plaso.
Dimes tur parlamentario presente lo tin oportunidad pa haci pregunta na minister di Husticia. E encuentro publico aki lo tuma luga awe pa 2pm. Fraccion di POR ta gradici minister di Husticia pa acepta e invitacion y pa acudi na Parlamento den un frega di wowo y tambe Presidente di Parlamento door di a pone un fecha a corto plaso pa e reunion aki.
