Esaki ta e prome experencia cu ex miembro di polis y ex- director di KIA, Rocco Tjon, tin como parlamentario y lider di fraccion di MEP. E ta haya cu logicamente e funcion aki ta un reto grandi p’e, ya cu su antecesor tabata e lider di partido y actual prome minister di Aruba, Evelyn Wever-Croes.

“Si bo ta wak tambe e lider di fraccion anterior, manera ta bisa, ta sapato grandi mi mester bay yena.”

Nivel di parlamento
Parlamentario Tjon ta haya cu banda di controla y bin cu ideanan den e institucion aki, y cu naturalmente ta existi un fraccion di oposicion y fraccion (nan) liga na e gobierno di coalicion, nan ta bay zorg pa purba di cera e ‘gap’ cu tin aworaki entre AVP y MEP. E ta kere cu na final di dia ta na bienestar di Aruba nan mester traha. Di nan banda como fraccion MEP, e ta sinti cu nan bon boluntad t’ey y nan ta sinti esaki di banda di AVP tambe.

Ya caba e proceso aki ta tumando luga caba, ya cu tin diferente comision fiho den parlamento cu ta conta cu representacion di tur fraccion. E acercamento aki ta wordo mira mas tanto entre e generacion nobo di politiconan di MEP y AVP den parlamento. Despues di nan reunion y ‘bou un kopie koffie nos ta keda debati riba e topico y den un esfera hopi sano’.

E trabou di eleva e nivel di parlamento ta inclui tur e fraccionnan tambe. Igualmente percura pa bin cu iniciativanan y ideanan pa eleva e producto di gobernacion en general. “Nos obstante cu e ta un minister di POR, minister di RED of di MEP, nos lo controla critico y obhetivamente.”

Trabou y prioridad
Aunke e ta un parlamentario nobato, sr. Rocco ta aprecia cu e fraccion di su partido a reconoce su experiencia pa loke ta trata e trabou cu el a haci den su trayectorio den e area di husticia, y muy particularmente den funcion di liderazgo. E lo traha duro como un team y traha duro pa adopta un postura pro activo y ‘busca un balans perfecto entre controla y ta critico pa cu e gobierno y nan plannan. Pero di otro banda pa percura for di parlamento yuda y complementa pa e plannan cu tin riba mesa por wordo ehecuta di un manera mas miho’.

Un prioridad ta traha un plan di maneho pa loke ta trata fraccion di MEP cu nan lo cuminsa cu ne na 2018. Nan lo comparti riba diferente tema caminda riba cada un di e temanan aki nan lo haci nan propio investigacion pa wak kico ta e leynan cu mester wordo adapta, revisa y introduci pa asina cada area ya sea social, labor, husticia, enseñansa, etc… pa nan por draai debidamente.

Un meta personal cu e tin como parlamentario y lider di e fraccion di MEP ta esun di cambia e manera di politica na Aruba. “Mi kier hiba un politica ariba nivel y al caso, sin insulto, pasobra asina ey nos no ta aporta na e calidad di gobernacion en general.”

Bon ehempel y prensa
E ta remarca cu como parlamentario nan tin un funcion di ehempel. Nan lo percura cu insulto personal den parlamento caminda no ta keda riba e topico, lo bira cos di pasado. Pa medio di e postura aki nan kier manda un mensahe pa nos comunidad, pero muy specialmente pa nos hobennan. “Mi lo kier buta un fundeshi solido pa un politica nobo na Aruba.”

E ta sinti su mes hopi honra cu e reto nobo aki, muy specialmente e echo cu el a haya e confiansa di por lidera e fraccion aki. “Partido Electoral di Pueblo tin un trayectorio grandi pa loke ta politica en general. Como partido nan a logra masha hopi mes”, asina e parlamentario a declara durante e entrevista aki cu Bon Dia Aruba.

Na final el a laga sa cu como lider di fraccion di MEP, e kier mantene un bon relacion y comunicacion cu prensa. Ya caba nan a bin cu chat group entre nan fraccion y miembronan di prensa, pa asina tur invitacion por bay, y e por ta mas accesibel pa prensa tambe.