Ta pidi Minister Glembert Croes copia di decretonan Ministerial

Fraccion di MAS kier mira copia di e Decreto Ministerial di dia 15 di October 2021, nr. BMAEI 229/21 firma pa Minister di Labor, Energia y Integracion, Sr. Glembert Croes. Esaki lider di fraccion drs. Marisol Lopez Tromp ta bisa den un carta pa Presidente di Parlamento, pa medio di cua a haci un serie di pregunta na e Minister.

E peticion ta conforme articulo III.17 di Constitucion di Aruba y articulo 59 di Reglamento di Ordo di Parlamento di Aruba. E lider di fraccion y partido MAS a manda un serie di pregunta por escrito dirigi na Minister Glenbert Croes. E preguntanan ta a base di e Decreto Ministerial (Ministeriële Beschikking) cu Minister di Labor, Energia y Integracion Sr. Glenbert Croes a manda pa e departamento di DIMAS (Departamento di Integracion y Admision y Stranheronan) aña pasa dia 01 di november 2021.

Ta preguntanan cu drs. Tromp a haci durante e reunion publico di Parlamento di dia 25 di November 2021 caba, pero pa motibo cu e reunion publico ey no a continua, e no a haya contesta ni durante ni despues riba su preguntanan. Tambe e kier pa Minister manda Parlamento un copia di e ‘startnotitie Toelatings en Integratiebeleid voor de kabinetperiode Wever-Croes II,’ esta e nota di maneho Admision y Integracion pa e periodo di gabinete Wever Croes II. E Parlamentario kier pa Minister Croes entrega Parlamento tur documento di maneho (nobo) -desde cu Gabinete Wever- Croes II a sinta dia 20 di september 2021, “cu bo persona y/of bo departamentonan a traha den cuadro di e maneho di Admision y Integracion?” Ademas, drs. Tromp kier pa Minister Croes por informa Parlamento si Minister ta cumpliendo cu e obligacionnan di Tratadonan cu pais Aruba ta mara na dje, cu ta regarda maneho di Minister su cartera y ehecucion di esakinan.

Recientemente Gobierno a anuncia cu lo a instala un comision ‘nobo’ segun e LTU. Lider di fraccion di MAS kier sa ken tur ta forma parti di e comision aki y kico tur ta tarea y experticio di cada un den e trabou aki? “Segun cua criterionan y procedura ta apunta nan? A cumpli cu e principionan di Good Corporate Governance? E Decreto Ministerial aki tin consecuencia pa e forma di proceder den cierto departamento y nos kier claridad riba esaki.”

Den su carta Marisol Lopez Tromp ta puntra cu si cu e apoderacion (machtiging) aki segun articulo 2, 3, 4, y 5 di e MB, Minister Glembert Croes ta duna Sr. Mario Croes un autoridad igual na e Director di DIMAS Sra. Paskel.. “Nan dos ta firma documentonan hunto? Of nan dos ta firma diferente documento den forma separa? Tur dos persona ta mes responsabel pa e decisionnan? – Si acaso nan ta firma y tuma decisionnan apart di otro, tur dos ta haya y mira y lesa tur documento/ peticion cu ta rekeri aprobacion di nan?”

Articulo 3 di e MB, ta papia di ‘inclusief eventuele aanvullende instructies,’ (inclusive eventual

instruccion adicional. “Ministro por informa Parlamento na kende (nan) ta referi den e articulo aki cu por duna e ‘aanvullende instructies’ nan aki? Minister Croes por splica kico Parlamento mester compronde bou di un ‘gelijkwaardig mandaat’ manera formula den articulo 4 di e Decreto Ministerial ? Minister por duna Parlamento un splicacion amplio y detaya con den practica e trabou ta reparti entre e directora mr. Paskel y e ‘leidinggevende,’ Sr. Wever?”

Minister por splica Parlamento con e proceduranan ta cana y con ta dicidi riba e peticionnan, ta e pregunta di lider di fraccion di MAS. “Si por splica e procedura stap pa stap. – Tur miembro di e comision mester ta di acuerdo? Minister por splica Parlamento con ta dicidi ken ta firma kico entre e directora y e leidinggevende? Cuanan ta e ‘nader te maken afspraken’ (palabracionnan cu mester haci ainda) relaciona cu e organisacion administrativo cu ta referi na dje den e MB?

“Por duna Parlamento copia di e reportahenan periodico cu a traha segun e MB aki? Segun articulo 3 di e Decreto Ministerial,( kende (nan) actualmente ta esnan cu por y ta dunando instruccion? E consehero y coordinadornan na Bureau di Minister Croes ta duna instruccion? Minister mes tambe ta duna instruccion? Kico ta e conseho di Departamento di Recurso Humano (DRH) riba e MB aki? DRH ta di acuerdo cu e contenido? -DRH a duna conseho riba e mandato?”

Finalmente e Parlamentario kier sa kico ta e conseho di DRH riba e nombramento di e leidinggevende Sr.. Wever? “For di kende (nan) e ta ricibi conseho huridico? For di esnan den DIMAS of for di esnan na Bureau di Minister?”

E Parlamentario a bisa di por ricibi pronto e contesta nan por escrito riba su preguntanan.