Fraccion di AVP den Parlamento di Aruba a entrega un peticion pa un reunion publico (openbare bijeenkomst) cu gremionan sindical, comercial y ATA pa asina atende cu e tema di e cambionan fiscal presenta pa Gobierno. Ayera Gobierno a presenta na Parlamento di Aruba un pakete di medida, disfrasa na reforma fiscal pa e aña 2023.
Pa aña 2023 nos comunidad lo wordo sacudi cu un pakete di medida, cu lo bay tin un impacto negativo den tur sector di nos comunidad. E perspectiva socioeconomico pa e aña 2023 a wordo ainda mas empeora cu e anuncio di e cambionan fiscal cu ta condena nos comunidad na un calidad di bida inferior.
Pa Fraccion di AVP e ta preocupante y inaceptabel cu Gobierno sosteni pa Fraccion di MEP-RAIZ den parlamento, tin e intencion pa aproba e pakete di medida aki, sin duna oido na e preocupacionnan di e tur esnan cu directamente ta bay wordo afecta cu e introduccion di e cambionan fiscal pa e aña 2023. Nos ciudadanonan, comercio y nos unico pilar economico cu nos ta depende ariba, cual ta turismo lo mester enfrenta medidanan devastador, manera entre otro e aumento drastico di BBO.
Ademas Fraccion di AVP a tuma nota di e consehonan devastador di Raad van Advies ariba e cambionan fiscal proponi pa Gobierno. Raad van Advies ta expresa preocupacion grandi pa e impacto negativo cu e cambionan proponi lo tin riba economia di Aruba y e calidad di bida den nos comunidad.
Gobierno ta scoge pa ignora cu turismo ta nos unico pilar economico y como tal ta di vital importancia pa Aruba. Gobierno ta propone medidanan cu por tin consecuencia devastador pa posicion strategico di Aruba riba area di turismo: e medidanan proponi lo afecta e animo di inversion y specialmente e animo pa cu mantencion y renobacion di hotel. Cu otro palabra e medidanan lo stimula deterioracion di nos producto turistico. Banda di esey Gobierno kier kita placa di ATA, cu lo debilita e mercadeo di e producto Aruba. Comosifuera poco e belastingplan aki lo aumenta gastonan pa turista, creando un Aruba hopi mas caro pa e turista.
Gobierno ta scoge pa ignora su responsabilidad pa cu un situacion social-economico stabiel. Cambionan fiscal dirigi riba comercio lo aumenta inflacion mas ainda y lo afecta e clima di inversion na Aruba cu lo stanca crecemento di nos economia. Aumento di impuesto lo aumenta costo di bida y na mes momento disminui e poder di compra di nos ciudadania. E resultado ta cu lo empeora e empobrecimento alarmante na Aruba.
E falta di consideracion cu gobierno ta demostra cu bienestar publico ta escandaloso y sin precedente. Pa e motibonan aki fraccion di AVP ta haci un peticion pa yama un reunion publico cu caracter di urgencia cu FTA, SEPPA, STT, SIWA, SADA, CAMARA DI COMERCIO, Comerciantenan Uni, SNBA, ATTIA, AHATA, ATA, RESTAURANT ASSOCIATION, TIMESHARE ASSOCIATION y demas gremionan sindical, comercial.
Lider di Fraccion di AVP, mr. Mike Eman a pone tambe riba su pagina social con alarmante e situacion ta. “Nos a caba di bataya den Parlamento cu fraccion di MEP/RAIZ cu kier bulldoze leynan di belasting (aumento di BBO y mas) cu consecuencia devastador pa pueblo, empresanan y turismo. Fraccion di AVP y MAS a exigi pa scucha gremionan sindical, comercial y ATA publicamente (openbare bijeenkomst), pero fraccion di MEP/RAIZ kier tene tur cos tras di portanan cera. Raad van Advies ta alerta pa efectonan negativo pa economia, pobresa y daño grandi na 2023 cu cambionan fiscal”, Eman a comparti riba su pagina social.
