Fraccion AVP no ta laga pasa e asunto di nombracion gobernador ‘sin mas’

E fraccion AVP, e partido den gobierno, no ta laga pasa e asunto di e nombracion di Alfonso Boekhoudt como nos proximo gobernador.

Den un relato e fraccion ta condena e forma di Reino y Hulanda a sigui e procedura.  “Pa fraccion di AVP e asunto aki ta algo serio, algo sumamente preocupante ya cu no por mishi cu derecho di un pais miembro di Reino Hulandes, pa despues pa medio di un disculpa aclaria y soluciona esaki y kere cu e cosnan aki ta algo di pasado y no mester atende cu esaki mas.”

Nan ta bisa cu te ainda e fracccion no a ‘fiha un posicion concreto’ contra e decision di minister Ronald Plasterk pa designa Alfonso Boekhoudt como gobernador di Aruba entrante prome di januari di 2017. Un situacion cu e fraccion ta yama ‘preocupante’.

E fraccion tambe ta referi na echo cu Hulanda a admiti cu loke a tuma luga ta contra e reglanan existente y ‘despues ta pretende cu mester lubida cu e nombramento di gobernador a bay contra di e reglanan aki, ta mescos cu bisa tur hende cu pone regla y palabracion un banda, ta algo corecto pa haci’.

Nan a reuni cu minister president Mike Eman y despues a declara cu ‘ta sigui atende cu e asunto aki ya cu no ta un asunto cu mester laga pasa bay sin mas y sin condena e forma di procede aki’.

Kico y den cua forma e fraccion lo bay haci, no ta conoci ainda.