Durante e reunion den Parlamento di diamars 26 di october, lider di fraccion di AVP, Sr. Mike Eman a presenta un mocion di parti di su fraccion pa locual ta trata e Plan Nacional di Prevencion y tambe a referi na e importancia di continuidad den gobernacion pa temanan di termino largo, manera entre salud publico.
Sr. Eman a indica cu e desaroyo di cuido medico na Aruba den e ultimo 20 añanan ta mira cu un realisacion continuo mas grandi cu banda di e cuido curativo, mester tin mas atencion pa e cuido preventivo y segun el a indica esaki a cuminsa algun aña pasa caba, e tempo ey bao di Minister Visser cu conscientisacion ariba obesidad. “Hopi trabao a wordo haci e tempo ey pa concientisa nos comunidad ariba e corelacion entre sobrepeso y salud di nos ciudadanonan”, el a bisa.
Manera ta conoci sobrepeso ta un di e causantenan di problemanan di salud mas grandi aki na Aruba y Sr. Eman a enfatisa e corelacion cu tin entre e importancia di movecion y den e vision di e gobernacion di 2009-2017. “Nos a corela e vision di movecion y obesidad na crea e espacionan tambe pa nos hendenan por cana y por recrea pa ta mas activo posibel”.
“Mi ta kere cu si bo mira rond aworaki e cantidad di camindanan cu nos a crea durante añanan pa nos por cana, core, y core bicicleta tambe mas sigur y mas atractivo tambe, sigur ta yuda pa locual ta trata entre otro obesidad”, el a agrega.
Sr. Eman a elogia Minister Oduber su atencion pa e diferente temanan di cuido cu ta hopi importante y cu ta wordo comparti entre tur partido y den e mesun contexto el a referi na e importancia di continuidad den gobernacionnan, specialmente ora ta trata di temanan di termino largo manera ta e tema di salubridad publico.
El a bisa cu unda cu tin continuidad e saldo total, ora cu mira kico pais Aruba a logra ora cu tin continuidad ta mucho mas cu ora cu un gobiernonan dicidi di cambia radicalmente temanan cu ta di prioridad pa gobernacion anterior y no tene na cuenta e impacto cu esaki lo por tin ariba e comunidad di e pais. El a enfatisa cu e tema di salud ta un tema cu mi ta mira un grado di continuidad cu ta sumamente importante y si ponele den contexto tambe di e SDGnan cu tin un meta cu mester alcansa hunto pa locual ta e 17 puntonan di interes nacional, di interes di calidad di bida di e ciudadanonan, e tema di continuidad ta importante.
“E ta papia di 20, 30 aña kiermen un trabao no ta termina cu un gobernacion di un of dos termino, e tin cu continua y mi ta contento cu awe nos por ta ‘kinan di un forma of otro pa nos por contribui tambe na e continuacion y motiva e pensamento tambe cerca coleganan, cu ta importante den e contexto pasobra no ta cuestion di kita of pone pa cualkier color politico, mi ta kere nos ta duna nos pueblo confiansa den politica si nos por mustra ariba continuidad cu tin den gobernacionnan ariba temanan nacional”.
Sr. Eman a señala cu durante e eleccion cu a pasa diferente partido, vooral partidonan nobo a accentua tambe cu tabatin falta di continuidad, nan a sinti falta di temanan di largo duracion y el a destaca cu ta ariba e temanan aki precisamente ta caminda tur hende por contribui na reforsa e pensamento- y visionnan di un pais sin e necesidad di cay den un discusionnan di ken si y ken no. “Ta trabao pa nos tur por sigui avansa pa nos pais”, el a expresa.
Den e cuadro aki tambe Sr. Eman como lider di fraccion di AVP a presenta un mocion pa e Plan Nacional di Prevencion. El a indica cu na aña 2018 na Hulanda a produci “Nationaal Preventie Akkoord voor een Gezonder Nederland”. El a splica cu e acuerdo aki a concentra ariba tres tema cu ta afecta e salud di comunidad, humamento, sobrepeso y uso di alcohol cronico.
Den su contestanan, Minister Oduber a menciona cu un Plan Nacional di Prevencion ta ariba mesa caba y den e contexto aki Sr. Eman a indica cu fraccion AVP ta presenta e mocion aki pa yuda impulsa y demostra e necesidad grandi pa un plan di prevencion nacional cu ta envolve henter e comunidad.
“E mocion aki kier duna un impulso na e pensamento aki cu un dictum cu ta lo siguiente; instrui e gobierno den e contexto di sigura un ambiente liber di humamento y tabaco y e necesidad di atencion medico preventivo pa alivia e deterioracion di problemanan di salud pa e elabora un plan preventivo nacional structural den consulta amplio cu e comunidad pa e proximo 15 añanan”.
Pa finalisa Sr. Eman a gradici Minister Oduber pa e contestanan ariba e tema di tanto Dr. Tromp, como Dr. Peterson, pero el a expresa su conseho na Minister Oduber pa envolve su mes trempan, den e discusionnan pa locual ta e tema specifico aki. “Mi a mira otro conflictonan cu mediconan cu no a termina bon cu e mediconan ta bandona Aruba y nos no por afford esey y segun mi a compronde e minister esey no ta e intencion, pero toch mi kier a enfatisa e necesidad pa drenta trempan den e discusion cu ta parce di ta den un impasse”, el a bisa.
