Cuatro di cinco candidato di oposicion cu a keda eligi pa e posicion di gobernador, den e eleccion siman pasa,  a sorprende henter pueblo di Venezuela ora cu nan a dicidi di huramenta dilanti di Asamblea Nacional Constituyente di Venezuela (ANC), cu a ser crea pa e regimen di Nicolas Maduro.

E grupo di funcionario cu a keda eligi y cu a bay dilanti di e asamblea pa nan huramento ta Laidy Gómez (estado Táchira), Alfredo Díaz (Nueva Esparta), Ramón Guevara (Mérida) y Antonio Barreto (Anzoátegui), tur di nan ta miembro di partido Acción Democrática (AD). E gobernador nobo di estado Zulia, Juan Pablo Guanipa, di partido Primero Husticia (PJ), a nenga di bay dilanti di ANC, ora cu el a comunica cu e organismo aki ta un fraude  y cu ningun ley ta stipula cu e mester huramenta dilanti di ANC. Guanipa a declara cu “pa coherencia, pa dignidad, Juan Pablo Guanipa, gobernador eligi na estado Zulia, no a bay den e huramentacion aki,  cu ta un proceso unda gobierno kier pone presion riba nos, via un chantahe dilanti di ANC y su directiva. Nos ta bisa cu e conviccion cu esun cu ta haci cos corecto (..) nos no lo hinca rudia dilanti di nan,” ora cu a haya sa cu tur cuatro gobernador di partido Accion Democratica a participa dene huramentacion.

Gobernador Laidy Gomez di Tachira a bisa via Twitter cu el a acepta e humiyacion aki, pa no decepciona su pueblo cu a dicidi di apoy’e den eleccion. Un splicacion similar e gobernador di Nueva Esparta a duna pa hustifica su huramento.

Presidente di ANC, Delcy Rodriguez a bisa cu e decision di Guanipa, ora cu el a dicidi pa no presenta dilanti di ANC, lo tin consecuencia.

“Lamentable cu e gobernador di estado Zulia no a huramenta dilanti di ANC, pero ta bon, tur ley di Venezuela ta pa cumpli y duna respet, asina ta cu  e accion di Guanipa lo tin consecuencia,” Rodriguez a splica.

Ami ta spera cu nos por continua cu e clima di reconocimento tambe. Despues cu presidente Nicolas Maduro a condiciona e toma di poder di e posicion di gobernador cu subordinacion na ANC, tur hende tabata pensa cu e grupo di oposicion no lo a bay dilanti di ANC pa huramentacion, como un acto di rebeldia y asina purba di duna respet na ley, cu no ta stipula participacion di ANC pa gobernador eligi  por tuma nan posicion. Sin embargo, Maduro a celebra e decision di e gobernadornan di oposicion cu a reconoce e poder cu ANC tin. Oposicion ta yama tur e gobernadornan cu a hura dilanti di ANC pa traidor.

Asina oposicion na Venezuela ta mustra herida den nan  lucha contra revolucion Bolivariano y nan liderazgo a keda marca como incoherente. Ex-diputado María Corina Machado, coordinador di partido di oposicion a bisa cu Venezuela a ser traiciona, y cu e huramento di e gobernadornan ta un traicion mas di e lucha di e ciudadano Venezolano

Di otro banda, Leopoldo Lopez, dirigente di partido Voluntad Popular a bisa cu “ e situacion aki ta un acto di traicion y engaño contra mayoria di Venezolano, cu a bay dia 15 di october den un proceso di eleccion, yen di fraude y cu a eligi nan como representante di grupo di unidad, pa asina sigui e lucha contra dictadura na Venezuela.”