FPNC ta uni na campaña ‘Limpi Limpi’ pa sigui yuda comunidad

Ayera mainta durante conferencia di prensa Minister di Transporte, Integridad, Naturalesa y Asuntonan di Adulto Mayor, Ursell Arends, a anuncia cu Fundacion Pa Nos Comunidad (FPNC) tambe ta uni na e campaña nacional di desperdicio ‘Limpi Limpi’.

Dia 22 di augustus ultimo gobierno a lansa e continuacion di e campaña nacional di conscientisacion pa maneho di desperdicio responsabel. Minister Arends a splica cu e meta di e campaña nacional ta pa amplia e actividadnan cu ta duna forma na e balor- y normanan individual como tambe cultural pa loke ta trata maneho di desperdicio na Aruba.

El sigui splica cu un di e actividadnan cu ta forma parti di e campaña nacional ta e actividad di ‘Baki den Bario’ cu ta cuminsa diasabra 2 di september y lo core te cu mita di december. ‘Baki den Bario’ ta un parke di separacion di desperdicio cu lo ta den rotacion di districto pa districto.

“Un di e actividadnan primordial cu ta enfoca riba dje ta separacion di desperdicio. Nos ta pone enfasis riba separacion pa asina cuminsa inculca esaki den nos comunidad. Mi ta contento di por bisa cu e campaña a resona profundamente no solamente cerca nos ciudadanonan pero tambe cerca companianan y tambe cerca organisacionnan,” el a remarca.

Minister Arends a anuncia cu FPNC ta uni su mes na e campaña nacional ‘Limpi Limpi’ y lo ta presente durante tur e acitividadnan di ‘Baki den Bario’ pa asina yuda e comunidad directamente.

Directora di FPNC, Gianaika van der Biezen, a enfatisa cu nan ta uni na e campaña pa asina e comunidad por haci uso di esaki pa yuda esnan den necesidad.

El a indica cu boluntarionan di FPNC ta bay ta presente tur diasabra di actividadnan di ‘Baki di Bario’ pa duna informacion y yuda pa asina e comunidad por haci nan donacion di paña, articulonan di cas y mas.

“Pa ta un poco mas specifico e pañanan mester ta den bon condicion, cu no tin mancha of buraco pa asina otro hende por haci uso di esaki. Tambe si tin articulonan di cas cu ta den bon condicion cu otro por uz’e y cu ta traha y cu otro famia por usa, fundacion por tuma esaki,” el a resalta.

Van der Biezen a subraya cu FPNC ta traha cu mas organisacionnan riba e isla y tin un lista di personanan cu ta haci peticion pa articulonan di cas. Na momento di haci entrega nan ta revisa e lista y asina ta haci entrega di e articulonan na e persona cu mester ricibi esaki.