Cruz Cora a haci un trabao enorme pa yuda den e logistica pa famianan por a sigui haya nan cuminda, a pesar di e crisis di COVID-19 cu a laga miles di hende sin entrada. Y awor, e tarea ey ta bay pasa pa Fundacion Pa Nos Comunidad, FPNC, Direccion pa Asuntonan Social y Buro Rampenbestrijding Aruba, BRA.

E organisacionnan ayera a duna un ilustracion di kico ta preparando pa haci pa tuma e trabao di Cruz Cora, aunke cu por ehempel pa FPNC, e ta mas bien un continuacion, pasobra e banco di cuminda ta un partner esencial den distribucion di ayudo di cuminda na Aruba. Pero, locual mester sucede awor ta cu e proyecto cu tabata cay bao Cruz Cora continua bao coordinacion di e partnernan menciona y pa esey sucede, sin cu tin pausa den e ayudo, mester di fondo di Parlamento.

Presidente di FPNC Francis Saladin y Director di e banco di cuminda, Gianaika van der Biezen a duna Parlamento un ilustracion di e trabao cu Fundacion Pa Nos Comunidad a haci den e periodo di crisis, unda mester a traha cu mas boluntario y otro partner, pa distribui cuminda pa esnan cu a keda sin nada debi na e caida economico na Aruba. Aunke cu Cruz Cora tabata yuda hopi hende, e organisacion tambe tabata conta cu e sosten di FPNC. Locual e ehecutivonan di e fundacion a mustra ta cu awor lo no ta diferente. Pasobra FPNC tin su logistica caba y sa con pa organisa e distribucion di cuminda. “No ta FPNC so ta haci e distribucion. Nos ta traha cu diferente instancia, otro fundacionnan pa asina sigura cu un grupo ta haya mas ayudo cu otro.” Van der Biezen a splica cu Centraal Bureau di Estadistica, CBS ta yuda pa asina haci un screening pa detecta e famianan mas vulnerabel. El a bisa cu e enfoke ta pa e cuminda yega, y ta haci distincion entre esun cu por busca of esun cu mester pa e cuminda yega na nan. “Den e ultimo aña, nos a percura pa esnan cu no tin transporte, haya nan ayudo te na nan porta. Mi directiva, ami y mi trahadonan ta cla pa e proyecto nobo.”

Tin bunita experiencia den un crisis

Di su banda, Presidente di FPNC, Francis Saladin a splica cu no mester bay tras di enfermonan cu algun hende lo a bende producto y cu por a haci ganashi cu e ayudo. Tambe pa e trabao cu awor ta den man di e organisacion. “Tin cierto preocupacion cu e maneho di e pakete di cuminda. Pero ya caba a hisa esaki na un nivel halto. E forsa di FPNC ta cu ta traha cu mas di 50 amigo. Nos no ta un organisacion independiente cu ta traha su so. Den e proyecto aki e lo no cambia. Nos mester djis percura pa e paketenan y e partnernan ta yuda.”

Saladin a enfatisa cu e enfermonan di e maluso di pakete di cuminda y voucher ta exagera y a daña imagen di hopi hende cu mester di ayudo. “FPNC a yega di haya critica cu ta yuda hende cu por traha. Pero realidad ta cu hopi hende tine dificil y no por para e proyecto djis pasobra cu por tin algun cu ta haci mal uso.” Di otro banda, Francis Saladin no ta kere cu tabatin abuso di e sistema di ayudo. “Nos no ta mira hende cu ta mal usa e ayudo. No mester mira tur cos negativo. Kizas algun hende ta bende un producto cu nan a haya, pasobra nan no por come tal producto y mester di e placa pa cumpra otro.” Den otro palabra, no mester laga sentimentonan negativo domina e impresion.

Riba dje, tin hopi elemento bunita cu a bin dilanti. FPNC a haya hopi mas boluntario, negoshinan cu a mira e balor di e banco di cuminda a pesar cu den pasado tabata critico y netamente awor ta contribui. Tambe a mira un cantidad di hoben cu a drenta e mundo di voluntarismo y ta yuda cu e trahamento di e paketenan y distribui esaki. Tur e trabao aki ta ilustra algo bunita, segun Francis Saladin.

Sosten di cuminda ta un proyecto cu tin su fin

Di su banda, Rino Hermans di BRA a bisa cu comunicacion ta bay ta crucial den e fase nobo di ayudo, y ATA lo yuda cu esaki. “Pero e ayudo aki ta un proyecto. E tin su comienso y su fin,” Hermans a bisa. “Si declara cu e crisis a pasa na September, e proyecto di pakete di cuminda lo conclui na December. Mester realisa cu esaki no ta un ayudo structural, no ta pa bringa pobresa.”

Tambe mester mira e ayudo aki los di e trabao cu BRA ta haci den cuadro di problematica di migrantenan indocumenta na Aruba. Pa esey tin sosten financiero di Hulanda y lo sigui traha riba e area aki, cu ta inclui tambe sostene e personanan aki cu nan cuminda.

Gino Marchena di Departamento di Asuntonan Social a expresa cu e trabao di e departamento ta pa yuda personanan re-integra den e sector laboral pa asina kita e necesidad pa ta dependiente di ayudo. Pero los di e grupo aki cu a perde trabao, tambe tin esnan cu no tin suficiente pensioen cu ta cubri tur nan necesidad y esaki ta un tarea cu ta continua hasta ora cu e proyecto di pakete di cuminda conclui.