FPNA y participantenan satisfecho cu sesionnan riba Parke Marino; Destruccion di coral tin efecto funesto pa poblacion di bida marino, segun piscado

Pa December, Parke Marino Aruba mester tin un documento cu ta contene pensamento di diferente stakeholder, basa riba cual lo formula un maneho. Asina Gerente adhunto di Parke Marino Aruba, Sietske van der Wal, di Fundacion Parke Nacional Aruba a bisa Bon Dia Aruba.

Van der Wal hunto ehecutivonan di Fundacion Parke Nacional Aruba a dirigi dos dia di sesion multidisciplinario pa haci e SWOT analisis di Parke Marino Aruba. SWOT, esta e analisis Strength, Weakness, Opportunity and Threat (Forsa, Debilidad, Oportunidad y Menasa) ta forma e base pa maneho di e Parke Marino.

Pero no solamente kier a haci e SWOT, pero di biaha bin cu solucion y accion. “Hopi biaha un SWOT ta keda pega na identifica e situacion, pero no ta bin cu solucion concreto,” Van der Wal a bisa Bon Dia Aruba. A percura cu den e sesionnan a pone hende di diferente sector, for di ambientalista te na expertonan riba naturalesa, di piscado y usuarionan recreativo, y tambe personal di Wardacosta, Bureau City Inspector, DIP, Universidad di Aruba hunto. Wardacosta por ehempel ta e instancia responsabel pa implementacion di e ley di proteccion di naturalesa riba lama.

“Motibo ta cu nos tabata kier un variedad grandi di representantenan di comunidad pa duna nan aporte, algo cu e participantenan a expresa aprecio,” e gerente adhunto di Parke Marino Aruba, “ya cu por presenta tur angulo, y haya comprension pa e posicion di e otro, pa asina cu mester tene cuenta cu necesidad di tur y particularmente esun di Aruba.”

Participacion piscadonan

Van der Wal a bisa di tabata hopi contento cu e participacion di piscadonan y cu nan mes a representa nan mes den e sesionnan, sin cu un instancia a apunta un vocero. “Si no tin comunicacion directo, por saca informacionnan y decisionnan for di contexto. E sesionnan a duna oportunidad pa piscadornan topa cu representantenan di Wardacosta pa asina trece claridad riba e papel y responsabilidad di ambos. Door cu comunica cu otro, combersa cu otro, nos tur ta realisa cu nos hunto tin un meta y e mesun meta, y esey ta pa lama di Aruba ta abundante, yena cu bida pa nos tur por goza y biba di dje.”

A identifica un cantidad di reto pa e Parke Marino, pa cada un di e areanan specifico. Tin cuater area designa como Parke Marino. Awor ta na FPNA pa pone tur e datonan aki hunto y pa December lo por tin tur compila. Lo presenta e datonan den e mesun formato, esta pa medio di sesionnan informativo pa publico en general. E momento ey, otro miembro di comunidad, di publico en general lo por duna nan punto di bista tambe riba locual lo sali afo prome cu FPNA defini su maneho specifico pa e parke marino.

ROPv

E ROP di 2019 a designa e cuater areanan marino como Parke Marino y FPNA a haya encargo riba nan. Pero mientrastanto a bin e ROPv cu ta e regulacionnan y leynan cu ta conta pa cada area identifica den e Plan di Ordenanza Teritorial. Consecuentemente ya caba tin ley cu ta goberna e area y locual ta bin acerca ta e maneho di FPNA pa e Parke Marino, teniendo e ley na cuenta y ki espacio e ley ta duna pa cumpli cu deseo di tur usuario.

“Nos no ta bay haci algo cu ta contra ley. Locual si por pasa, ta cu ta bin algun regulacion adicional pa proteha e bida marino.”

Pa Van der Wal, e tabata bunita pa mira e intercambio cu tabatin entre e diferente gruponan cu a participa na e sesionnan. Tur cu nan mesun punto di salida, di diferente edad y interes. Esey ta hopi bunita pa mira, cu si nos tur tin nos nanishi den mesun direccion, si nos kier un lama abundante, yena cu bida marino, nos por traha hunto.

Experiencia piscado

Leslie De Couteau ta un piscado cu ta usa harpun y el a participa na e sesionnan. E ta contento di a tuma e oportunidad pa sa mas di e Marine Park. “Awor ta mira en realidad kico kier logra. Nan tin e bienestar di tur hende na pecho,” De Couteau a bisa. “Locual kier ta pa percura cu ta bin bida back den lama. Y esey ta algo bon.”

Piscadonan por sinti nan mes menasa pasobra no tabatin hopi informacion. “Nos por usa e lama, pero tin cuater area unda no ta permiti.” De Couteau mes ta haya cu miho a laga e Parke Marino na tres area, “pasobra uno ta net den e boca di waf, un luga cu tin hopi trafico.”

Leslie de Couteau a bisa cu locual el a ripara den tur su añanan ta tira pisca, ta cu tin movecion di e poblacionnan di pisca. Y tur ta conecta cu e salud di coralnan. Unda coralnan ta muri, no tin pisca. “Si tuma Cabez bin abao, antes e tabata masha bunita, hopi coral, hopi pisca. Despues di horcan, e coral a kibra y e piscanan a bay. Antes dilanti hotelnan, e tabata hopi bunita. Pero awe, tur coral ta morto. Esey ta pa motibo di e trafico. Yen di trafico, boto, catamaran, speedboats. Mi no ta bisa cu e ta malo, pero tin mucho movecion riba awa. Pues mester regula. Algo mester sucede.”

Pero De Couteau ta preocupa tambe pa e cantidad di awa sushi cu ta bay pa lama, particularmente na e area di Palm Beach. Tanten cu awa sushi of hasta awa trata ta keda bay den awa di lama, e ta keda afecta e calidad di awa y ta stroba bida marino. “Ora cu trata awa sushi, ta usa kimico y un porcentahe ta bay den lama.” Consecuentemente, mester reconoce cu parti di lama di Aruba ta contamina.

E piscado ta kere den educacion prome cu cantidad di hende cuminza pisca. E generacion nobo mester haya conocemento pa e realidad di awendia. No por djis sigui cu e custumber bieu, pasobra situacion di lama a cambia. “Mi ta haya cu mester ta miho controla, tambe spearfishing cu ta loke ami ta haci. Si nan kier bin cu temporada, y regulacion, mi ta de acuerdo. Pero e Marine Park ta mustra cua ta e luganan cu por practica piscamento. Con e tabata bay te cu awor, no por sigui mas,” el a bisa firmemente. Y p’esey e ta aplaudi e sesionnan informativo cu a trece mas claridad p’e.