Ayera e organisacion independiente di conservacion di naturalesa conoci como Fundacion Parke Nacional Aruba (FPNA) a haci uso di e ocasion di Dia Mundial di Mama Tera pa revela su transformacion y awor a bira Aruba Conservation Foundation (ACF).

Den un entrevista cu Edeline Berg, ken ta fungi como communications & marketing manager, Tyson Lopez CEO di e fundacion y Natasha Silva, ken ta director di conservacion, nan a conta cu for di juni di aña pasa nan ta bin papiando con e organisacion a cambia di ta un organisacion di maneho di parke pa un organisacion di conservacion.

Den e ultimo 7 aña, e fundacion a experiencia un expansion di su rol y su responsabilidadnan banda di maneha Parke Nacional Arikok, como cu el a wordo apunta pa maneha varios areanan protegi adicional rond di Aruba.

Na aña 2017, nan a cuminsa haci mas accion di conservacion, unda cu pa algun biaha comunidad no tabata compronde kico ta lo cual nan tabata haciendo, por ehemplo, nan a cera entrada di e parke na Shete, un entrada ilegal den e diseño di e parke. “Esey tabata pa nos purba minimalisa camindanan pa tin menos auto cu ta core cu menos impacto pa naturalesa,” Lopez a splica.

E aña aki area di mangel y saliña RAMSAR site #198 Spaans Lagoon a wordo a añadi na e responsabilidad di e fundacion, y den aña 2019, Parke Marino, cu ta consisti di cuater area marino protegi, oficialmente a wordo apunta bou e maneho di e organisacion.

Den 2020, 11 area terestre adicional a wordo agrega na e maneho cu ta inclui areanan manera Duinen Sasarawichi, Saliña Malmok, Rooi Lamunchi y Costa Sero Colorado, entre otro.

Adicionalmente, e fundacion ta participa activamente den esfuersonan di conservacion cu ta inclui colaboracion cu varios NGO local y internacional pa programanan manera conservacion di Shoco, restauracion di mangel y coral, reintroduccion di e ‘Lora’ cu ta un especie endemico y extinto na Aruba, maneho di especienan invasivo, y educacion den comunidad di Aruba, specialmente pa muchanan di scol.

Pa un miho maneho di e trabounan cu ta keda bira mas amplio y pa mitiga e presion creciente riba naturalesa, e fundacion a pasa door di un proceso strategico integral di 2020 pa 2022 pa asina determina su direccion nobo pa e proximo añanan.

Na juni di aña pasa, nan a lansa e strategia pa e proximo 10 aña, parti di strategia ta cu nan a cambia di organisacion pa maneho di parke pa un organisacion di conservacion y naturalesa, e ora ey nan a introduci Multi Annual Corporate Strategy 2023 – 2032 cu ta marca e organisacion su prome mapa strategico cu ta responde na retonan nobo ecologico, social y economico, y ta representa e organisacion su compromiso cu conservacion, cu un enfasis riba sostenibilidad, biodiversidad, mehoracion di sistema ecologico y iniciativanan di restauracion.

Pa e motibo aki nan a dicidi di rebranding, debi cu pa hopi hende den comunidad nan tabata reconoci como “Parke Arikok”, pa ta mas comprendibel kico ta nan trabou, pa alinea e direccion strategico nobo y accionnan di conservacion di ACF pa asina cambia e percepcion y imagen di un organisacion tradicional di maneho di parke cu solamente ta opera dentro di frontera di parke y cu ta enfoca solamente riba recreacion. Asina a adopta su direccion nobo como un organisacion moderno di maneho di conservacion cu e ta awo.

Awe, ACF ta reconfirma su posicion como Aruba su bos pa naturalesa cu e organisacion actuando y bogando pa proteccion, preservacion, y restauracion di e isla su sistema ecologico y biodiversidad, recordando localnan y bishitantenan di nan conexion cu naturalesa.

“E pensamento ta cu nos ta pone naturalesa na prome luga y e recreacion ta bin despues, pasobra nos ta compronde tambe cu recreacion ta importante pasobra hende mester conecta cu naturalesa pa asina por stimele. Pero prome ta naturalesa y esey mi ta kere nos ta haciendo den ultimo añanan tambe, hasta cu por ehemplo, kier bin cu e wind turbine na Vader Piet. Nos a cera un di e cuevanan pa asina por salvaguardia e poblacion di raton di anochi y tin diferente accion cu nos a tuma, cu ora hende ta wak nos como extremista, eigenlijk nos ta haciendo nos trabou di conservacion y ta algo cu comunidad di Aruba no ta compronde of no ta custuma cune pa ora mester cumpli cu reglanan of regulacion,” Lopez a sigura.

Esaki ta consehonan cu expertonan a bin duna pa hopi aña caba pero cu nunca a wordo haci y nan tin cu haciele, e ta nifica hopi mas trabou pero naturalesa mester bay den prome luga loke tambe ta nifica e reduccion di nan entrada, unda nan stop UTV y ATV den parke pa e conservacion y nan mester transforma pa tin otro tipo di recreacion y esey ta e idea pa nan bira mas sostenibel, manera Lopez ta señala.

Di su parti, Natasha Silva a splica cu nan ta bezig pa finalisa un documento cu mester yama “Conservation Framework” unda nan pone nan prioridadnan di conservacion di naturalesa. Un parti grandi ta colaboracion unda nan mester di comunidad pa haci esaki y tambe pa preveni degradacion di naturalesa of menasanan cu segun el a expresa. Menasanan ta hopi y na e momentonan aki tin casi 20 cu ta primordial pa nan por atende cune, por ehemplo, e diferente forma di polucion, polucion di desperdicio, polucion di luz, polucion di zonido, rozamento di tereno, cambio di clima, entre otro.

“Na fin di dia, e menasanan ta bin for di ser humano, kiermen e solucion ta den nos man tambe,” el a expresa.

Cambio di nomber

E nomber “Aruba Conservation Foundation” a wordo scogi pa capsula ACF su actividadnan amplio, paso di berdad, naturalesa no ta conoce frontera. E inclusion di “Aruba” ta crea un sensacion di orguyo, asina reflehando e compromiso di e organisacion na e isla cu e ta sirbi y tambe indica geograficamente e localidad di e fundacion.

Cu e transicion di e organisacion, a bira vital pa e transicion tambe wordo mira den e nomber nobo. E palabra “Conservation” ta duna significacion na e organisacion su compromiso pa conserva Aruba su herencia natural y cultural awo cu e organisacion ta maneha casi 25% di e isla su area terrestre y 0.2% di e isla su awanan teritorial.

Por ultimo, tabata imperativo pa inclui e palabra “Foundation” pa asina pone enfasis riba e status di e organisacion como uno independiente y un entidad legal reconoci, pa asina e no wordo confundi mas cu un departamento di gobierno.

Logo y identidad visual

E logo nobo ta refleha forsa y complehidad mientras e ta encarna e cadushi iconico, un especie cu por wordo mira riba casi henter e isla y tambe e combinacion di elementonan di naturalesa manera olanan di lama y liñanan circular cu ta representa awa.

E logo ta diseña pa refleha ACF su compromiso na Aruba y su hendenan y ta simbolisa union y accion colectivo.

Na e centro di e logo tin e silueta di un solo troncon di cadushi, cu ta duna honor na e resiliencia di e isla y su hendenan, inspira door di Aruba su sistema ecologico y biodiversidad abundante y diverso, e colornan nobo ta captura e vibracion y rikesa di e isla su flora y fauna. E colornan ta refleha locual ta wordo haya den Aruba su mondi, saliña, lama y area di costa manera e Cododo, e Barica Hel, e Gutu y e Shoshoro, entre otro.