Comision Trafico Sigur den colaboracion cu Telearuba lo presenta otro siman Diamars 28 Mei 2024, su di dos programa di Forum dedica na promove siguridad den trafico.
Den e prome programa na luna di April, expertonan a duna splicacion amplio riba e importancia di uzo di asiento pa mucha (Child Car Seat) y e consecuencianan cu por tin si no haci uzo di dje.
E biaha aki lo pone atencion na con pa core corectamente riba e rotondenan di Aruba, no ta tur rotonde ta mescos, kico ta e diferencianan, kico mester haci y no haci ora cu bo ta riba un rotonde of saliendo for di un rotonde. DTI lo tey presente pa informa tocante di e importancia di Keur bo auto y uzo corecto di Faha di Siguridad. Segun data internacional di World Health Organization (WHO) e uzo di Faha di Siguridad por salba bo bida cu un probabilidad di te cu 50%.
Lo tin un specialista Toxicoloog cu lo informa tocante di influencia di alcohol riba e automobilista, kico ta e fayonan cu ta surgi den comportacion, habilidadnan y riesgonan cu por spera. Ministerio Publico tambe lo t’ey presente pa duna informacion y splicacion tocante boetnan y eventual castigonan cu ta wordo aplica pa e diferente tipo di accidentenan ora cu alcohol ta hunga un rol.
Sintonisa TeleAruba dia 28 di Mei 2024 na Canal 13 y 23 of Live riba YouTube. E programa lo cuminsa pa 8:30PM di anochi despues di Telenoticias. Comuninidad henter di Aruba ta keda cordialmente invita pa forma parti di e programa. Por manda preguntanan via Whatsapp na +297-597-2323 y panalista nan lo contesta bo preguntanan na final di programa.
Hunto, ban haci nos camindanan mas sigur pa un y tur.
Salba Bida, Scoge pa Siguridad!
