Aruba, hunto cu 10 pais di nos region Latino Americano y Caribe, a firma un acuerdo na Argentina cu ta wordo yama Declaracion di Buenos Aires. E acuerdo importante aki ta encera un serie di iniciativanan pa promove e sistemanan y netwerk di e bibliotecanan, pa nan por traha riba tereno digital den nan respectivo paisnan.
Directora di Biblioteca Nacional Aruba, Astrid Britten a bay representa nos pais na e reunion aki, y el a firma e acuerdo. E documento aki, di seis punto, a wordo firma diaranson ultimo na final di e Foro di Secretarionan y Ministernan di Cultura di America Latina y Caribe. Nan a bay di acuerdo pa promove reforma tocante derecho di autor na nivel nacional. Tambe nan a compromete pa bin cu instrumentonan legal cu ta defini e excepcionnan relaciona cu e derecho aki, y e limitacionnan di e bibliotecanan, archiefnan y museonan.
Ademas di Aruba, e documento aki a wordo firma pa e ministernan y/of representantenan di Argentina, Brasil, Costa Rica, Ecuador, Spaña, Grenada, Jamaica, Mexico, Nicaragua, Panama, Paraguay, Peru, Puerto Rico, Republica Dominicana y Uruguay. E reunion aki a bira un escenario ideal pa e minister- y representantenan di cada pais por a comparti informacion riba e desaroyo di e biblioteca den nan pais, nan contribucion den desaroyo sostenibel, y nan plannan pa futuro.
E convenio aki ta reconoce e contribucion di e bibliotecanan como motor di cambio, y nan a acorda pa e bibliotecanan por haya recurso, apoyo y infrastructura necesario pa asina nan por cumpli nan mision social.
Otro punto tin di haber cu e ministernan di cultura di e nacionnan aki –na Aruba biblioteca na resorta cerca minister di Enseñansa– ta compromete pa reforsa nan sistema di biblioteca den nan respectivo pais y promove e red di intercambio regional.
Cu e firma di e acuerdo aki, e paisnan di America Latino y Caribe ta ratifica nan compromiso cu e agenda 2030 di Nacionnan Uni. Cu e ayudo di e bibliotecanan, nan ta bira un fuente di acceso di informacion pa logra e metanan aki. Aruba pa di cuater biaha lo ta sede di e proximo Acuril 2019 (Association of Caribbean University, Research and Institutional Libraries), cu lo cuminsa dia 2 di juni venidero. E biaha aki e tema central tin di haber cu e metanan di desaroyo sostenibel di Nacionnan Uni pa 2030.
Dia 2 di juni tin un pre conferencia pa gruponan specifico cu a pre inscribi. Apertura di e conferencia lo tuma luga riba dialuna 3 di juni. Minister di Enseñansa, Ciencia y Desaroyo Sostenibel dr. Rudy Lampe ta invitado special y tambe orador. Su charla ta titula: ‘A new name for the SDG’s’. Clausura di Acuril lo ta diahuebs dia 6 di juni.
