Manera Bon Dia Aruba a publica den su edicion di diabierna 22 di juli, por a mira con e situacion di Fort Zoutman ta na e momentonan aki, cera y bandona unda cu a duna espacio pa personanan ambulante cu ta den area di Oranjestad por haci uso di e luga pa proteccion y pa “haci nan cosnan” for di bista di hende.

Bon Dia Aruba, continuando cu su investigacion pa haya sa kico a pasa cu e icono di nos capital y su trahadonan, a tuma contacto cu algun di e trahadornan, y un so a duna su testimonio na redactor di e corant aki den un forma anonimo.

E persona en cuestion a splica cu e tabatin varios aña trahando na Fort Zoutman y cu antes e tabatin un fundacion cu personanan cu tabata “stima cultura y stima museo.” Pero ex-minister di Cultura na e momento ey Otmar Oduber, a hala esnan den e fundacion un banda y a pone hende nobo den e fundacion. Ademas a crea un logo nobo y a trece “hendenan jong, cu ideanan mas fresco”.

Segun el a manifesta, “Otmar mes tabata kier pa trahadonan di gobierno firma y bay den e fundacion nobo, pa tur hende keda den e fundacion ey y por draai miho. Pero nan a haya conseho di nan sindicato pa no bay den e fundacion nobo cu tabata riba subsidio – si subsidio ta stop kico lo pasa cu nan? P’esey nos a dicidi di keda traha pa gobierno cu tabatin un entrada sigur, pero e cos tabata cu si bo no a firma bo tin cu bay.”

Pa loke ta trata e trahadonan, tabatin esnan cu ya caba tabata traha na Fort Zoutman cu tabata cay bao di gobierno trahando cu e fundacion bieu, cu “despues a ser desmantela pa crea e fundacion nobo” manera e persona aki a señala. Den su opinion, lo tabata miho pa nan mescla e trahadonan di e fundacion anterior cu e fundacion nobo, pero esey no a sucede.

El a conta cu e manera con e trahadonan di e fundacion anterior tabata traha no tabata na e agrado di e directora di e fundacion nobo, cu ta Fundacion Museo Arubano (FMA), den cual a hinca tur e museonan cu awe ta cera bao dje. El a bisa cu nan tabatin nan regla pa traha y door di esey nan a cuminsa piki riba e trahadonan di gobierno.

Tempo despues nan a trece un manager nobo pa deal cu e trahadonan, “cu semper tabatin un clash cu nos, pero nan no por a haci nos nada. Djis nan a pone nos un banda unda cu nos tabata traha e Bon Bini Festival y esey no a wordo traha mas.”

Bon Bini Festival tabata un di e festivalnan mas conoci cu tabata tuma luga den Fort Zoutman desde dia 7 di mei di 1985 cu a cuminsa cu su prome edicion. E tabata atrae hopi turista, pero segun e persona aki, nan a stop di hacie debi cu a cambia su concepto. “Nan a pone un grupo so pa toca, un monopolio di nan cu nan,” unda cu e prijs pa entrada a subi di 5 florin pa 10 florin. “Y e concepto no tabata echt canando manera mester ta”, el a sigura.

Di e festivalnan Bon Bini di FMA nobo, el a declara cu e gruponan a cuminsa keha, e mesun hendenan a cuminsa keha tambe. “Nan tabatin un monopolio eynan cu tabata draai den e fundacion.” Tambe el a indica cu nan tabata celebra otro dianan como 18 di Maart y tur e dianan ey a wordo kita, “pasobra nan no por handle e situacion y p’esey tur cos a bay atras”, el a señala.

Tabatin aproximadamente siete persona den e directiva di FMA, pero e no tabata wak nan hopi, dos persona so cu tabata e director Anky Vrolijk y e secretario. “Di e siete hendenan ey, nunca bo tabata wak nan sino dos so.”

Igualmente, el a sinti cu FMA nobo a cuminsa exclui e trahadonan bieu y cu esey no tabata su luga mas. E no tabata sinti bon trahando asina, tampoco mirando cu nan no mag di haci nada; solamente esnan nobo cu FMA a pone den museo pa traha. “Algun di nan tabatin mas di dies aña trahando, unda cu a cuminsa puntra pa un schalering, pero e director di FMA no a traha e carta pa manda Departamento di Recurso Humano pa haya un salario mas halto. Nan a mester a busca un otro caminda. Incluso e trahadonan di e fundacion mes tabata haya presion di e director, cu tabata esun cu tabata dicidi tur cos y si bo no tabata hacie manera e kier, bo tin cu bay cas. E director mes no tabata sa dirigi e luga.”

 

Tambe el a bisa cu FMA tabata haya hopi fondo di diferente instancia cu mester a wordo usa pa mantencion di e luga, “pero nan tabata biaha, haci tayer na otro pais y saca potret. E museo mes tabata den decadencia y ora pandemia a yega nan a manda tur nan trahadonan cas, mientras cu e otronan cu tabata bao gobierno por a keda y traha pa asina e luga por a keda habri. Nan tabata haya salario di gobierno cu nan por a keda, pero nan a dicidi di cera e museo pasobra segun nan, no tabatin trahado.”

Aworaki e ta pensa cu ta hopi tristo con e luga ta, tanto paden como pafo. Pero e no ta pensa cu algun obhetonan di cultura y tradicion por a ser horta pasobra nan tabata den un cashi di glas hopi diki. “Por ta nan a horta un television, pero articulonan mes di museo no.”

“Nan a laga e museo cera mucho tempo caba y awor pa trec’e back ta hopi dificil, bo tin cu push cosnan den dje pa e por haya su bida. E ta bay ta hopi dificil si ta keda cu e mesun fundacion, pasobra nan no tin amor pa cultura”, el a finalisa.

Continuando cu e investigacion, redactor di Bon Dia Aruba a manda diferente pregunta na minister di Cultura Xiomara Maduro, entre otro:
Dicon e museo aki ta cera? Kico tabata e problemanan?
Por a compronde cu ex-minister Otmar a bin cu un fundacion nobo (Fundacion Museo Arubano) unda cu Museum of Industry, Community Museum (den Nicolaas Store), Carnival Museum tambe ta cay bao di dje, tambe ta cera. Dicon?  Mal maneho? Kico a pasa cu e placa cu instancianan manera APA y Mondriaanfonds di Hulanda a duna na FMA? Esey tabata pa cubri kico? Kico a pasa cu Bon Bini Festival, cu tabata atrae hopi turista? Kico ta Museo Fort Zoutman su futuro?

Di esaki, minister Maduro a contesta: “Nos tin atencion pa e situacion di museonan cu ta cera y pa e motibo aki mi lo reuni proximamente cu FMA pa por haya contesta riba e mesun preguntanan cu ta wordo haci aki y algun mas. Lo ta bon pa tuma contacto cu FMA, kende ta esnan cu na prome instancia ta responsabel pa duna splicacion, ya cu e maneho di e museonan ta cay bao di nan como fundacion”.

Redactor di Bon Dia Aruba a tuma contacto cu director di FMA, Anky Vrolijk pero e no a duna ningun reaccion.

For di varios publicacion historico, por a saca afo cu Fort Zoutman ta e construccion di mas bieu riba Aruba.

El a wordo inaugura na 1796 door di Gobernador di “Curaçao, en onderhorigheden” Sr. Johan Rudolf Lauffer den e area di Paardenbaai pa proteccion di Aruba su waf contra atakenan di e Frances, Ingles y tambe e piratanan cu tabata tin bista riba barconan di transporte cu tabata transporta cabay pa Jamaica y Cuba.

E tabata e centro di administracion di Aruba su gobernacion desde 1816 te cu 1911. Ta varios funcion e forti aki tabata tin. E tabata caminda “raad van politie” tabata situa, pues esnan cu tabata maneha Aruba un tempo. E tabata tambe un prison, warda di polis, postkantoor, duana, belastingkantoor, hardin experimental pa plantacion di aloe, deposito pa departamentonan di obranan publico y mas.

Willem III toren a wordo inaugura na 1868 door di Commandeur Ferguson como un vuurtoren cu su luz a wordo cendi riba 19 di februari di e aña ey. Riba cumpleaños di Rey Willem III.

Ta rond di Fort Zoutman, e area awe conoci como “Oranjestad” a nace. Awe por mira e icono di Oranjestad den deterioro total unda e capital ta bay cumpli su 200 aniversario na augustus 2024.

Potret di e toren cortesia di Aruba Paradise Photos.