(NTN24) – Forsanan Militar di Colombia ta considera e posibilidad cu e narcotraficante Ecuatoriano Adolfo Macias alias “Fito,” ken recientemente a scapa for di un prizon di Guayaquil, por ta refugia na nan pais.
Asina a sugeri e general Helder Giraldo ken a bisa cu “ta posibel, pero pa esey nos tin un dispositivo amplio pa asina ey por captura di manera efectivo e terorista aki,” el a bisa.
Ademas, e comandante di Forsanan Militar di Colombia a referi na e presonan cu a huy for di e prisonnan Ecuatoriano durante hechonan di violencia di e grupo criminal “Los Choneros” y a sigura cu “tin 20 persona profugo pa lo cual nos ta hopi atento.”
Segun e militar a bisa, autoridadnan di Ecuador a logra recaptura 200 preso cu a huy di e prisonnan den ultimo dianan.
Pero militarnan Colombiano no solamente ta monitoria alias Fito sino tambe nan ta alerta debi na e fuga di Fabricio Colon Pico, lider di e gang “Los Lobos,” ken tambe a scapa for di prison despues cu fiscal general Ecuatoriano Diana Salazar a acusel’e di planifica un atentado den su contra.
E hipotesis di e general ta cu “Los Choneros”, lidera pa Fito y otro gruponan criminal di Ecuador, manera “Tiguerones,” cu ta opera na provincia fronteriso di Esmeraldas, tin “un relacion cercano” cu gruponan arma Colombiano por ehemplo, Frente Oliver Sinisterra, disidencia cu a disparce di FARC y ta opera na teritorio Colombiano.
Mester menciona cu debi na e crisis di siguridad cu Ecuador ta bibando, autoridadnan Colombiano a militarisa e frontera cu nan pais bisiña pa evita e paso di profugonan y criminalnan di e pais aki.
“E prioridad ta pa cera e paso na e lidernan di e gruponan arma aki cu na un dado momento lo kier pasa na nos teritorio, Giraldo a sigura.
