Forsanan di seguridad Palestino a lansa un operacion incomun contra grupo di militantenan local den norte di West Bank, usando auto blinda y envolviendo nan den tiroteonan intensivo cu a mata por lo menos dos hende den e area volatil.
E redada ta marca un paso poco comun pa e Autoridad Palestina, e organo gobernante den e zona semi-autonomo den West Bank ocupa cu ta mundialmente reconoce pero cu a perde hopi di su control pa bastionnan militar manera Jenin, unda forsanan a opera durante e weekend te ayera.
Trupanan Israeli a ocupa e vacio den e ultimo añanan, specialmente despues di e atake militante di Hamas di 7 di october, 2023, cu a causa e guera actual na Gaza. Autoridadnan di salud Palestino ta bisa cu 811 Palestinonan a ser asesina desde e tempo ey den West Bank, mayoria pa redadanan Israeli den ciudadnan y barionan Palestino. Israel ta bisa cu mayoria di e personanan asesina tabata militantenan.
Diasabra, forsanan di seguridad Palestino a bisa cu nan a cuminsa e operacion den e campo di refugiado di Jenin, un bastion cu ta un centro pa militantenan pa basta tempo caba. E operacion a sigui ayera, y reporteronan di AP a tende tiroteo intensivo y a mira por lo menos dos vehiculo Palestino blinda ta rondona e frontera di e campo.
E oficina humanitario di ONU a bisa cu e forsanan di seguridad a tuma control di un parti di e hospital na Jenin, usando e como base y lansando atake for di eynan. Forsanan a detene por lo menos ocho homber, sacndo un di nan for di e hospital riba un stretcher, segun ONU.
E agencia principal di ONU pa Palestinonan, UNRWA, a suspende su servicio, incluyendo scolnan.
E grupo militante Islamic Jihad y Hamas ta opera libremente den Jenin, y su cayanan ta regularmente yena cu posternan cu ta presenta luchadornan asesina como martirnan di e lucha Palestino. Nombernan hoben cu ta carga radio ta patruya e halnan di caya.
Israel ta bisa cu e grupo militantenan ta parti di e “axis di resistencia” di Iran. Esakinan ta ricibi financiamento y otro sosten for di Iran, pero nan ta profundamente presente den sociedad Palestino.
E forsanan di seguridad ta “operando segun un vision politico claro” di e liderato Palestino “tocante e importancia di impone orden, establece e regla di ley, restaura paz y seguridad social,” vocero Brig. Gen. Anwar Rajab a bisa. E trupa tabata enfoca riba “destrui” grupo sosteni pa Iran cu ta purba crea “caos y anarkia,” el a agrega.
Forsanan di seguridad Palestino a reporta e morto di dos persona den e abordamento: un homber di 19 aña, Rabhi Shalabi, cu a ser tira mientras e tabata riba brommer, y un militante di Islamic Jihad, Yazi Jaayseh.
Forsanan di seguridad, cu inicialmente a nenga cu nan a tira Shalabi, despues a admiti e incidente den un declaracion diabierna, pero nan no a bisa dicon nan a tira e hoben. Su primo di 15 aña, cu tambe tabata riba e brommer, a ser tira den su cabes y a keda herida. Oficialnan di ONU , usando grabacionnan local, a bisa cu e dos no tabatin arma y tabata entregando cuminda for di un restaurant ora nan a ser tira. Segun nan, Shalabi a hisa su dos mannan den aire prome cu el a ser asesina.
No tabata claro dicon e Autoridad Palestina a dicidi pa lansa e operacion awor. Tal accionnan no ta popular den e publico Palestino, unda hopi ta acusa e forsanan di seguridad Palestino di colaboracion cu Israel.
E trupa Israeli a bisa cu nan no tabata envolvi den e operacion y no a duna ningun comentario adicional.
Oficial senior di Hamas, Mahmoud Mardawi, a critica e operacion di e Autoridad Palestina na Jenin como un “intento pa termina cu e resistencia.” Den comentario publica pa Hamas ayera, el a pidi pa e Autoridad Palestina “para inmediatamente cu e comportamento anti-patriotico cu ta sirbi e ocupacion.”
Merca ta purbando pa fortalece e Autoridad Palestina, cu nan ta spera lo yuda dirigi Gaza despues di e guera.
Oficialnan di e White House no a duna comentario publico tocante nan posicion riba e operacion na Jenin. Oficialnan di e Conseho di Seguridad Nacional di Merca tampoco a duna comentario.
Den total, for di cuminsamento di e guera, ONU ta bisa cu por lo menos siete Palestinonan a ser asesina pa e forsanan di seguridad Palestino, y por lo menos 24 Israeli tambe a ser aseina pa perpetradornan Palestino den West Bank.
