(EFE) – E Hulandes Max Verstappen (Red Bull) cu diasabra ultimo a proclama e tripel campeon mundial di Formula Uno, fin di siman ultimo a gana e Gran Premio di Qatar e cual a tuma luga na Lusail unda e Spaño Fernando Alonso (Aston Martin) a conclui den e di seis luga.
Verstappen di 26 aña recien cumpli, a logra su victoria number 14 di temporada ora a gana na Lusail marcando ademas e buelta rapido dilanti di dos McLaren, e Australiano Oscar Piastri, cu ayera diadomingo a caba na e di dos luga despues di anota sprint di diasabra y ademas di e ingles Lando Norris cu tambe a subi na e podio.
Esaki tabata un carera hopi duro, cu hopi calor y humedad, den cual otro Spaño Carlos Sainz (Ferrari) no a participa ora poco antes di e carera a descubri un “problema den sistema di combustibel na su auto” segun su escuderia a señala. E Mexicano Sergio Perez (Red Bull) a conclui den e di nuebe luga, pero despues di un di tres penalisacion pa surpasa e limitenan di pista anuncia husto na final, loke a causa cu el a perde un luga y a clasifica di 10.
Aproximadamente cinco ora prome cu e carera a anuncia cu pa motibonan preventivo y pa mas siguridad, tabata obligatorio cu e tairanan no mester tabatin un duracion superior na mas di 18 buelta, unda cu cada piloto mester a haci minimo tres parada pa cambia nan tairanan.
