Ayera mainta formadornan di gobierno, lider di partido Futuro Gerline Croes y lider di partido AVP Mike Eman, a reuni cu Gobernador di Aruba Su Excelencia Alfonso Boekhoudt, pa brinda informacion pa loke ta e proceso di formacion di gobierno y informa cu e partidonan a logra yega na un base di acuerdo pa forma un coalicion den gobierno nobo.
Lider di partido Futuro Gerlien Croes, den su declaracion na prensa pafo di oficina di Gobernador di Aruba, a splica cu nan esaki tabata e prome di algun reunion cu nan tin planifica cerca Gobernador di Aruba. E intencion di e prome reunion aki tabata pa duna Gobernador di Aruba un bista amplio di e desaroyonan andando den e ultimo simannan pa loke ta e proceso di formacion di gobierno.
El a sigui splica nan ta na altura cu pueblo ta en espera y kier sa kico ta e siguiente stapnan pa loke ta e maneho y gobernacion di e pais, pero esaki ta un proceso cu tuma su tempo y mester tene cuenta tambe cu a pasa un ley pa locual ta e screening y e proceso di formacion di gobierno, locual tambe a tuma su tempo y lo bay sigui tuma su tempo den e siguiente procesonan cu ta bay encamina.
Croes a enfatisa cu lo mas importante pa comparti di e prome reunion aki ta cu AVP y Futuro a yega na un base di acuerdo unda cu e puntonan di salida cu nan a yega na dje ta suficiente pa bisa cu ta wak e posibilidad pa forma un coalicion.
El a indica cu e realidad ta cu ta hiba diferente dialogo, negociacion, discusion di kico ta e dominionan mas importante na e momento aki y con lo kier bay reparti esakinan, y e cantidad di personanan tambe cu mester maneha e pais den e siguiente gabinete.
Croes a informa cu e partidonan a acorda cu e siguiente gabinete lo tin siete minister, y a acorda tambe cu a cuminsa papia di e reparticion di esakinan y den un siguiente fase lo comparti e detayenan di esaki.
“Loke ta mas importante ta e base di confiansa cu e proceso aki a trece pa cada nos como partido. Nos ta bisa nos tin un base pa por traha cu otro. Aruba tin hopi reto su dilanti, pero mi ta kere Aruba tin hopi oportunidad tambe y a yega momento pa Aruba conoce un gabinete cu ta bay enfoca ariba e di dos. Pa hopi aña nos a wak retonan ta bin y hopi biaha nos a lubida cu e comunidad aki mester wordo inspira di nobo y esaki tambe ta bay refleha den e gabinete aki,” el a enfatisa.
El a remarca cu e partidonan a bin cu pensamentonan diferente y moderno pa loke ta e reparticion di dominio, pero a indica cu na e momento debido lo comparti esaki. “Pero sigur mi ta kere cu e base cu tin na e momento aki pa nos bay atende primordialmente cu e situacion cu Hulanda, e situacion financiero y e oportunidadnan cu tin ta na e momento aki lider di nos pensamento,” el a agrega.
Croes a subraya cu e ciudadano ta un punto primordial tambe. El a señala cu na e momento aki tin mester di un ahuste y alivio, manera indica den nan den puntonan di salida como partido, y a papia di empodera e ciudadanonan.
“Nos sa cu na e momento aki e situacion no ta facil, pero nos tin cu busca e oportunidadnan y cambia e forma cu nos ta atende cu e maneho di e pais aki, sobre todo financieramente duna atencion un rato na e comunidad, na e hende local. E desaroyo economico a tuma over na nos pais, nos a enfoca grandemente riba esaki y a lubida un tiki riba e pueblo y aworaki esey ta e punto di salida pa un siguiente gabinete,” el a enfatisa.
Lider di partido AVP Mike Eman a indica cu den e ultimo simannan tabatin hopi speculacion si ta partido Futuro ta pidi hopi of ta partido AVP ta pidi hopi. El a remarca cu nan ta cana un proceso cu ta duna e seguridad cu di parti di tur dos partido, e temanan cu nan ta considera hopi importante pa locual ta nan programa di gobernacion, locual ta nan pensamentonan, por ser refleha tambe den e reparticion di cartera.
“Nos a inverti hopi tempo den esaki pa nos tin un base di confiansa hopi fuerte pa tur hende drenta den e gobernacion aki cu e sosten di nan partidonan cu un animo hopi grandi pa traha pasobra nan ta reconoce nan mes den e forma cu a haci e reparticion. Esey mi ta contento cu nos a haci esaki den e forma cu nos a haci’e pasobra el a crea un base di confiansa hopi grandi pa nos por continua cu e siguiente fase,” el a subraya.
E siguiente fase, el a sigui splica, ta busca e candidatonan y consolida e programa di gobernacion. El a indica cu hopi di e temanan nan a repasa tambe durante e proceso di dialogo riba carteranan y ta mira kico ta pisa como puntonan di prioridad pa cada partido. “Esey a haci cu nos ta hopi leu na e momentonan aki di por sinti otro, di por tin confiansa di por bay traha cu otro pa nos por logra un gabinete di coalicion cu ta yega su final,” el a agrega.
Contestando pregunta tocante si e reparticion di cartera den partido AVP lo ta basa riba experiencia of cantidad di voto, Eman a splica cu no a yega na e punto ey ainda. El a indica cu esey ta un proceso interno di partido cu, mescos cu traha un lista di partido, semper tin su retonan cune, pero a resalta cu den partido AVP e sentimento grandi ta cu Aruba ta cla pa un gobierno nobo.
“Tin un pobresa grandi den nos comunidad y e perdida di poder di compra tabata enorme e ultimo siete aña, Aruba ta anhela un direccion cu ta bay tene cuenta cu e dolornan cu ta bibando. Nos a mira decisionnan cu gobierno ta tumando na e momentonan aki tambe no ta yudando e proceso ey, kiermen nos ta haya hopi importante pa e gobierno nobo aki sinta rapidamente pasobra esey lo cambia e direccion di enfasis, caminda nos no ta wak e crecemento economico so, pero con nos ta reparti e crecemento pa e yega den cada hogar na Aruba, locual ta haci hopi falta na e momentonan aki,” el a indica.
El a señala cu un contribucion hopi grandi di gobierno di AVP cu Futuro ta e cambio di pensamento, un forma diferente di wak economia di Aruba, no solamente cifranan di crecemento den turismo y economia, pero con e ta yega na e ciudadanonan, pensionadonan, esnan di menos recurso, y esnan cu salario minimo. “Nos ta sinti cu e comunidad ta en espera di un mehoracion pa e gruponan specifico aki hopi rapido y den esey futuro cu AVP sigur ta haya otro,” el a resalta.
