Awe mainta a cuminsa circula rumornan cu un politico lo mester a haya conseho negativo den e screening pa minister pa e siguiente gobierno. Ministerio Publico ta forma parti di e proceso aki pero nan no ta e unico cu ta aporta na e conseho cu ta sali. Di parti di Ministerio Publico nos no por a haya ningun confirmacion riba conseho for di PG, pasobra esaki no ta algo publico. Pero Ministerio Publico si por a confirma cu nan ta cla cu nan conseho pa locual ta e screening. Nos a acudi na formador y lider di partido MEP Evelyn Wever-Croes riba e rumornan aki y si lo por a aclara si ta berdad cu tin un conseho negativo. El a contesta Bon Dia cu: “No. Esey no ta corecto. E proceso ta andando ainda. Asina cu tin algo di meld, mi ta laga boso sa.” E formador ta bisa cu tur cos ta canando su caminida normal. El a laga sa tambe cu en berdad Ministerio Publico no por duna e informacion aki. Nos lo keda pendiente riba cualkier desaroyo den esaki.
Nos a publica algun dia pasa cu segun nos fuentenan e cartera di Husticia ta bay pa Andin Bikker (POR), Turismo pa Dangui Oduber (MEP), minister Plenipotenciario pa Ady Thijsen (MEP). Tambe tin indicacion cu e cartera di Financia ta bay pa Xiomara Maduro (MEP). Pero nada di esaki a keda confirma cerca e formador.
