Ayera merdia formador Evelyn Wever-Croes (MEP) ta informa prensa despues di reuni cu gobernador cu lo bin cu un ministerio di integridad bou cartera di minister di Asuntonan General. E no tabata dispuesto pa divulga cua carteranan lo cay pa cua partido ainda.
E lider di partido MEP a ripiti cu pronto lo e proceso di formacion di gobierno wordo finalisa. El expresa cu ‘e luz na fin di e tunnel ta na bista’.
E puntonan cu ta wordo atendi actualmente ta cua carteranan lo bay pa cua partido den e coalicion. Tambe cua candidatonan lo wordo trece dilanti pa por bira minister. Si pa diabierna e gobierno nobo lo wordo forma y e ministernan huramenta, sra. Wever-Croes no kier a duna un contesta definitivo. Esaki segun e pasobra nan ta depende riba otro departamentonan pa por finalisa e ultimo tokenan riba e proceso aki.
“Ohala pa diabierna esaki lo por wordo finalisa. Pero manera den pasado mi a yega di duna un planning y nos no a cumpli cu ne, awor mi ta masha cauteloso di duna un planning actualmente”, sra. Wever-Croes ta expresa cu un sonrisa.
Segun e formador, e proceso di screening pa candidatonan por bira minister ta wordo regla pa medio di un decreto nacional, den cual ta stipula tambe kico e formado tin cu haci por lo minimo encuanto e proceso aki. Alabes sra. Wever-Croes ta splica cu e proceso cu ta andando ta pa crea un rapport pa gobernador por tira bista riba dje. Pues ‘tambe mester duna gobernador su espacio pa e controla con e proceso a bay y asina determina si e ta confortabel cu loke mi a trece dilanti. P’esey tambe mi ta depende riba otro departamentonan’.
E cantidad di minister manera e formador a yega di trece dilanti den pasado, ta keda como punto di salida riba 7. Sinembargo ora di forma coalicion tin di tene cuenta cu diferente aspectonan cu por crea e awa den biña cual a bira un expresion regular di e formado.
Ministerio di integridad
Sra. Wever-Croes a duna di conoce cu lo bin cu un ministerio di integridad, cual lo cay bou cartera di minister di Asuntonan General. Esaki debido na e manera con integridad a bira manera un liña cora den henter e campaña cu MEP a hiba. “Pasobra transparencia, bon gobernacion y integridad ta asina importante pa nos, nos a dicidi di eleva esaki na nivel di un ministerio.”
E intencion segun sra. Wever-Croes ta pa e ministerio aki percura pa crea conscientisacion den henter e aparato gubernamental riba kico integridad ta y pa tur hende ta riba mesun liña di comprension pa e topico aki. “Tin hende por ehempel cu ta yuda un persona y ta tuma un 10 florin pero ta acepta esaki pasobra e persona a wordo yuda bon. Pero tin hende cu ta considera cu un ayudo asina ta parti di su trabou pues e no por tuma placa p’e.”
Aparte di esaki e ministerio aki lo trece controlnan top down den henter e aparato gubernamental, cual segun sra. Wever-Croes ta e rason cu a dicidi pa eleva e asunto aki na nivel di minister. “Nos ta cuminsa cu e ministernan djey bin abou.”
Ministerio lo prepara e ‘integriteitskamer’
Ademas e ministerio aki lo tin un tarea hopi importante, segun sra. Wever-Croes. Esta pa bin cu un ‘integriteitskamer’ (camber di integridad) cu lo ta iniciativa di Aruba mes. “E integriteitskamer por wordo compara cu Caft. Caft ta controla riba tereno financiero, pues e departamento aki lo tin e tarea di controla gobierno riba tereno di integridad. Mescos cu Caft e integriteitskamer lo ta independiente, pues los di gobierno pa por haci nan tarea optimalmente.”
E formado a duna un ehempel di e proyecto di hospital cu actualmente ta wordo discuti den parlamento, specificamente pasobra tin algun preocupacion pa loke ta trata e destaho publico cu a tuma luga y tambe e contracto original cu a wordo firma. Riba e tereno aki e integriteitskamer lo por haci un diferencia, segun sra. Wever-Croes.
E rason cu e ta kere cu mester bin cu e instituto aki na Aruba, ta pasobra si esaki no bin manera iniciativa propio, Hulanda lo pone nan propio instituto eventualmente. “Nos no kier esey manera el a pasa cu Caft.”
Segun e formador esaki ta un punto importante pasobra te hasta na otro islanan den Reino tin preocupacionnan cu Hulanda lo impone un instituto asina for di ariba. Pues e ta compar’e cu e situacion na 2014 prome cu Aruba a haya e KB y Caft. “Cuanto biaha Hulanda a pidi nos pa nos mes bin cu un begrotingskamer pa controla financia publico di e pais? Pasobra anos no a bin cu esaki despues cu nan tabata pidi nos pa haci’e nan mes a bin cu ne.”
Sra. Wever-Croes a desmenti cu esaki a bin como recomendacion di parti di Hulanda. Sinembargo nan kier siña di e situacion na Sint Maarten, pasobra ‘si bo bin cu algo bo tin di trece algo cu Hulanda lo respeta tambe’.
