Den cuadro di formacion pa proximo gobierno di Aruba, formador Evelyn Wever-Croes ta bin reuniendo cu diferente stakeholders for di algun siman pasa na unda cu ayera den oranan di mainta el a ofrece un conferencia di prensa pa duna un update tocante formacion.

Manera el a sigura, desde juni te cu augustus a pasa dos luna di eleccion y e proceso di formacion ta bayendo hopi bon manera cu nan a premira, ademas el a indica cu nan a firma acuerdo di gobernacion entre partido Raiz y MEP na unda cu nan lo enfoca riba dje den e periodo dilanti.

Aworaki nan ta bezig finalisando e reparticion di carteranan pa mira cua ministerio ta bay pa partido Raiz y MEP na unda despues nan lo traha pa finalisa e parti di candidatonan cu ta bay ta minister.

Wever-Croes a señala cu tin hopi speculacion andando y mal informacion ta wordo duna di ken a pasa of no e proceso di screening y pa cu esaki el a sigura cu “nos no a yega den e punto ey ainda”, nan ta trahando riba e tur e trabounan cu mester wordo haci cu ta algo cu ta tuma tempo y cu su mes kier tum’e na serio pa asina nan lo presenta e candidatonan pa minister y reparticion di ministerionan ta e miho interes pa Aruba lo wordo sirbi.

“Mi kier pa duna nos un chens, nos ta kedando cla y speculacionnan di ken a pasa screening of no, ningun di nan ta berdad pero nos no ta eynan tampoco ainda” Wever-Croes a menciona.

Di loke ta trata reunion cu stakeholders, el a bisa cu esey ta tumando luga pa motibo cu e acuerdo ta den liñanan grandi y nan a palabra cu prome cu 31 di october cada minister lo duna su parti pa nan tin un programa di gobernacion cu ta bay mas extenso den diferente punto, p’esey reunionnan cu stakeholders ta keda importante pa e ora nan ta traha nan programa.

Reunion cu Cruz Cora

Ayera tambe nan a reuni cu Cruz Cora pa lo cual Wever-Croes a indica cu e reunion a bay bon y el a gradici pa tur e trabou cu nan a haci durante e pandemia na unda nan a sirbi 10.000 famia cu paketenan di cuminda durante pandemia, den total nan a sirbi tambe 100.000 cuminda cayente na esunnan cu tabatin mester di dje.

Ademas, a trece dilanti diferente retonan cu Cruz Cora ta enfrenta y con nan hunto cu gobierno por yega na un miho cooperacion pa yuda esunnan mas vulnerabel den comunidad.

Reunion cu Ateliers 89

Den reunion cu Ateliers 89 a trece dilanti un punto hopi importante manera Wever-Croes a expresa cu tin di haber cu mesun cos cu deporte ta inclui den scolnan, tambe nan a sugeri pa inclui arte den scolnan na unda cu hopi di muchanan y hobennan tin e talento artistico y di e forma ey e por expresa arte di un manera apasiona cu lo por yuda pa kita e mucha riba caya y evita e riesgo cu e lo por bay den mal caminda.

Reunion cu Fundacion Movimiento ta Bida

Di esaki, el a destaca cu ta un fundacion cu ta dedica su mes pa mehora e calidad di bida di adultonan mayor na unda tambe a indica cu nan ta dedica pa personanan cu ta den edad di pension, cuminsa prepara prome cu esey pa wak kico nan ta bay haci y no sinta den un stoel y soya e cual Wever-Croes a sigura cu esey no ta algo mucho productivo, nan a mustra kico nan ta haci pa mantene tur e adulto grandi al dia cu e parti di digitalisacion, pero tambe eventonan social y movecion pa tene nan saludabel, el a sigura cu e programa cu e fundacion a mustra ta hopi interesante na unda nan a pidi pa mas sosten pa asina por yuda mas adulto mayor.

Tambe e fundacion a pidi pa gobierno oficialisa e luna di october como luna di hende grandi y esey ta algo cu nan ta bay traha riba dje, manera el a comenta.

Reunion cu Asociacion di Ingenieronan y Arkitecto Arubano (ADIA)

Nan ta un asociacion di stakeholders cu ta asisti gobierno den desaroyo y construccion e cual nan a trece varios punto dilanti cu ta pidi atencion di gobierno caminda cu Wever-Croes a señala cu ta puntonan conoci y importante ta pa regula e mercado akinan pa motibo cu tin hopi hoben cu ta studiando pa ingeniero, contratista of arkitecto y tin biaha ora nan ta kedando cla cu nan estudio nan no ta haya mucho atractivo pa bin Aruba back mirando cu mester di un studio pa ta contratista.

Ademas, el a afirma cu mañan diahuebs nan lo sigui cu reunion di stakeholders na unda cu e lista ta cada bes mas chikito pa asina cuminsa reunionnan cu stakeholders interno, cu ta departamentonan di gobierno cu tambe ta importante den cuadro di formacion pa nan por tin un bon bista di dje.

“Nos no lo bay sinta cu tur departamento, esey ta keda na cada minister cu lo haci y mi lo asisti unda cu ta posibel pero si esunnan cu tin cu duna nos un bon bista di kico ta e retonan mas grandi den gobierno na e momentonan aki”, el a sigura.