Lider di MEP, Evelyn Wever-Croes a informa riba algun desaroyo nobo den su tarea como formador di gobierno na su salida fei gabinete di gobernador ayera mainta.

Di un banda ya caba e partidonan cu ta forma e gobierno di coalicion aki, MEP, POR y RED a bin cla cu nan programa di gobernacion. Tambe nan lo crea un procedura pa atende cu cualkier impasse cu lo por sosode den futuro pa evita cu e coalicion por keda solido te final di nan periodo di gobernacion.

Ta keda cu 8 en bes di 7 minister
Igualmente aunke e proceso di reparticion di caretera ainda no a tuma luga, nan a cuminsa sinembargo cu e proceso di screening riba algun candidatonan potencial pa bira ministernan.  Ademas nan ta reconsiderando pa baha e cartera ministerial di 9 pa 8, y no mas pa 7 manera inicialmente partido MEP a anuncia prome cu eleccion. Na ta considerando e cambio aki debi na e  magnitud di e problemanan cu nan mester atende y e forma con nan lo hacie, el a bisa. Pa loke ta su opinion  personal e ta kere cu mester want’e na 7, pero ora cu nan ta ‘negosha un coalicion bo mester pone awa den biña’. “Pero mester evalua hopi bon ora bo ta pone e awa den biña aki.”

Tambe ora MEP a aspira pa haya e mandato absoluto den eleccion ultimo nan ta kere cu por goberna cu 7 ministerio. Pero MEP no ta bay goberna su so sino cu pueblo a pidi pa un coalicion y den esaki e ta reitera cu nan mester yega na e reparticion di ministerio mas husto cu ta posibel. “Y cu 7 probablemente esey no ta posibel.”

E ta haya cu e reparticion aki mester tuma luga di un manera mas husto cu ta posibel entre e partidonan. E no ta sinti cu esaki lo bira un problema entre nan mes cu lo pone den peliger e coalicion aki. E disponibilidad t’ey, tambe nan tin compromiso riba e temanan, pues e no ta weita cu lo por bin problema den e ultimo fase aki. Igualmente e ambiente di debate entre nan mes a cambia hopi y a bira mas dinamico. El a bisa cu e ambiente semper tabata ‘bon, amigabel y cu hopi respet’. “Pero naturalmente e ta keda dificil ya cu e ta un proceso algo nobo cuy ta tuma luga den nos pais despues di 20 aña.”

Programa di gobernacion
Sra. Wever-Croes  a bisa cu nan a bin cla cu e programa di gobernacion cu tabata locual a tuma hopi tempo, y e ta spera cu e siguiente fase final di reparticion di cartera y nombramento di ministernan no lo tuma basta tempo. E no kier cu e fase ultimo tuma mucho tempo.  E tambe como formado kier pa Aruba haya su gobierno mas pronto cu ta posibel. Ya caba Aruba a conoce un parlamento nobo, e ta haya cu ya caba nos por mira algun cambio den nos organo legislativo unda e presidencia y vice presidencia di parlamento, como e mayoria, ta den man di e coalicion.

“ E ta un alivio grandi”, el a bisa.

E programa di gobernacion aki a tuma mas tempo di loke e mes a premira, y tambe e proceso final di formacion di e gobierno nobo. E ta argumenta cu esaki ta un oportunidad unico y algo nobo despues di hopi tempo cu Aruba no tin un gobierno di coalicion. “Y nos kier hacie bon”, sra. Wever-Croes ta comenta. Ademas e programa aki ta e base di e coalicion.

Un di e tema principal di nan programa di gobernacion ta e situacion financiero di pais Aruba cu e ta considera un desafio hopi grandi. Nan ta reuniendo cu departamento di Financia caminda nan a haya un documento hopi elabora di nan cu mas informacion. Nan lo sigui reuni cu e departamento aki pa asina nan por ta bon informa prome cu nan ta wordo  instala como gobierno.

Otro tema tin di haber cu integridad ya cu e ta considera cu mester trece bek e confiansa di e comunidad den e gobernacion. E ta haya cu e tema di integridad nan kier tene bon guia y controla. Actualmente nan tin cu atende cu un mandatario cu ta cera den prizon y ainda e ta minister di e gabinete actual.

Tambe tin otro terenonan cu ta demanda nan atencion y cu ta poni den nan programa di gobernacion:  Manera siguridad, bon cuido di salud, bon calidad di enseñansa, etc…

Igualmente el a anuncia cu nan a cuminsa cu e di tres y ultimo fase cu ta e reparticion di e ministerionan y despues e partidonan nan mes lo punta kendenan ta bira nan candidatonan pa bira minister, ya cu e ta considera cu esaki no ta parti di su responsabilidad como formado.

Otro punto cu nan a haci den cuadro di trahamento di e programa di gobernacion ta yega na e palabracion ta cu cualkier topico of echo cu ta bin dilanti  y cu e partidonan di e coalicion no ta haya nan mes den dje, ‘e no ta un motibo pa bo baha e gobierno’. “E no ta un motibo pa bo kibra e coalicion.”    Nan ta bay palabra un procedura con pa  atende cu e tipo di situacion aki.  E ta kere cu e palabracion aki ta esun cu ta cera full e coalicion aki.

Reparticion di cartera y screening
Pa loke ta e parti di reparticion di ministerio cu ta e siguiente paso cu nan ta bay drenta, formado di gobierno a laga sa cu ya caba e tin un bista di kico nan deseo ta, pero el a prefera di no bay den detaye ainda.  E  ta kere cu ta mas importante pa pueblo por haya sa kico finalmente ta bira e reparticion di e carteranan ministerial.  Den e proceso aki di seleccion di e minister tin un combinacion di diferente  factor cu ta bay determina na final di dia kende ta esun cu ta bay bira minister, segun sra. Wever-Croes.  Entre otro, experiencia politico, cantidad di voto, experiencia den e materia, etc… El a splica cu pa un partido manera RED  pa ehempel cu tin un asiento so den parlamento e ta un situacion diferente cu un partido manera MEP cu tin 9 asiento den parlamento.

E proceso di screening tambe a cuminsa encamina. Aworaki –segun formado di gobierno- nan ta den e ultimo fase caminda locual ta e reparticion y e  personanan cu lo bira minister ta bin dilanti.  Nan considera e proceso di screening hopi importante, considerando cu integridad ta punto number uno of dos banda di financia den gobernacion ‘anto e proceso di screening ta uno cu mester wordo teni cu hopi cautela’.