Mescos e proceso di formacion na Hulanda, esun na Aruba tambe ta tardando, aunke el a cuminza despues. Esey na promer instante ta mustra un escogencia positivo, pa motibo cu kier scucha mas tanto hende y entidad na caminda pa elabora un programa di gobierno, cu ta reuni na e mihor manera e deseonan cu ta biba den comunidad. Y ta parce cu e partidonan cu ta participa bao di liderazgo di Formador y de paso lider di gobierno demisionario, ta tuma e tarea di scucha ‘stakeholders’ di un manera cu nunca antes ningun gobierno na caminda di nace a yega di haci.

Mas di 100 conversacion cu diferente gremio, organisacion, grupo di interes, por ta util pa conoce a fondo e preocupacion y deseonan cu ta existi, pero despues di cierto tempo ta cuminza genera reaccion negativo tambe. Mas y mas hende ta cuminza puntra nan mes si di berdad mester tuma tanto tempo pa e tarea aki, y cu tin otro asunto cu ta exigi atencion di gobierno, demisionario of no.

Manera e reaccion bastante laat riba e aumento drastico di e casonan di Covid, cu felizmente den e ultimo dianan a cuminza mengua. Esey no ta kita cu, mientras cu gran parti di comunidad tabata pendiente di accion gubernamental, no tabatin mucho ta sucede, sigur no den sentido di control riba establecimento di bida nocturno, unda por a observa caba cu ‘e cos aki no por bay bon nunca’. Sigur ta cu nos por tabata mihor proteha si no a kita tur medida pareu, manera ta riba luna nos ta biba. Ora e variante nobo y mas contagioso di Covid a surgi, tabata cuestion di tempo pa e yega nos isla, cu ta biba di tin porta habri.

Pero unavez e situacion ey ta bao control, ainda nos ta keda hinca cu un formacion di gobierno cu ta birando sospechosamente largo. Aki ta unda e speculacionnan ta cuminza lanta cabez, tocante e problemanan interno, principalmente den e partido grandi cu ta bay participa den e proximo gobierno. Asina lo tin varios candidato cu ta desea e puesto di ministro di husticia, y ta remarcable cu ta menciona net nomber di e politiconan elegi como parlamentario, cu tin un background policial. Aparentemente ta supone cu esaki ta e experiencia laboral apto pa bira ministro di husticia, pero nos ta duda si esey ta asina. Ta parce cu desde un empleado di laboratorio a fungi den e puesto ey, no ta necesario mas pa tin un mandatario encarga cu husticia cu tin un diploma di un facultad di derecho reconoci. Pero, nos lo tende na su debido tiempo ta ken ta bira, pa evalua seguidamente su merito particular.

Tambe parti di e speculacionnan ta bay riba e tema, no desconoci, di menaza cu bandona partido y de paso bay cu e asiento adquiri den ultimo eleccion. Esey en berdad no ta un asunto cu lo por bira realidad pa promer biaha, pero no por comenta riba esey sin mira e otro banda di e asunto. Esey ta cu no semper un politico por bandona un partido grandi y opta pa crea su propio minipartido. Hende ta cuminza fada di e cos ey y no ta tur cu subi e caminda ey ta haya e apoyo popular pa crea nan propio alternativa, cu mester tin un orientacion politico, aunke sea minimo, y no por ta depende di e mero popularidad di un persona. Y hasta si un persona dicidi di keda cu e partido, den e siguiente eleccion e por ta sigur cu e otronan lo no lubida loke a pasa y e no lo ta den e posicion mas pa haya asiento den Staten, o no lo ta riba e lista mes.

Sin embargo, nos por kere cu cierto problema entre e personahenan halto di un partido, si acaso esey ta berdad, ta suficiente motibo pa ta contento cu un proceso largo di consulta, cu te fin di october ta bay desemboca den claridad na pueblo ta cual ministerio tin y kico concretamente nan ta bay haci? Nos ta kere cu tin mas tras di esaki. Esey ta cu e ‘tardanza natural’ aki cu ta bin di un consulta magno historico asina, ta haci tambe cu ta bay tin un tardanza den e proceso di consulta cu Hulanda, unda e Uitvoeringsagenda lo bay conoce bastante retraso, cu ta pone tur loke por y mester haci, limpi den otro aña. Y, ademas, e Hulandesnan no por rabia, pasobra inmediatamente por bisa nan: “boso no ta mihor cu nos; di maart caba boso ta den e cos aki”.

E diferencia ta si cu cerca nan tin mas actuacion decisivo como mandatario demisionario, mientras cu cerca nos ta parce cu Aruba no tin gabinete mas, sino un superministro, cu a acumula gran parti di e carteranan. Fuera di Asunto General, nos Promer Ministro tin aparentemente responsabilidad tambe pa Infrastructura, Salud Publico, Enseñanza, Transporte, Comunicacion y Sector Primario, mientras cu nos por ta lubida algun. Un situacion sano? Na nos parecer no, cada ministro carga nan responsabilidad te ultimo dia, ta p’esey ta paga nan. Si no, di e manera aki nos ta bay rumbo pa fin di aña, sin presupuesto, sin plan di gobernacion, sin claridad kico ta bay cambia eventualmente entrante 1 di januari 2022. Y esey ta conveniencia di ken?