Sinterklaas ta cay tempran e aña aki…

Realmente formacion di gobierno involuntariamente ta birando comico. Lastima cu e formado(a) no a mira e banda chistoso di esaki, pero ainda e por hacie: duna un mail adres unda tur hende y instancia cu ta desea, por deposita nan verlanglijst pa Sinterklaas, cu e aña aki t’ey tempran. Lo ta necesario pa e adverti tur hende si, cu no hay plata pa tantas cosas y cu prome cu Sinterklaas bay gasta mas placa, mester pensa prome con pa crea un forma pa deshaci di casi 200 miyon florin pa 2018 di gasto cu t’ey caba, te pa haci debe nobo pa cumpli cu lista di deseo di diferente banda.

Lastima cu e asunto aki no tin su banda comico so. E diferente peticion o advertencianan cu tin asunto desatendi y cu nan mester atencion urgente, den mayoria di caso no por pone nan un banda sin mas, alegando cu no ta bay tin placa por lo pronto pa haci algo. Y ademas, si como gobierno bo ta cuminsa defende bo mes bisando:”pakico di tur e tempo ey, bo no a pone e asunto aki den scochi di esun cu tabata t’ey?”, masha lihe e disco ey ta keda raya. Tambe, e contesta, no cordial ni cortes, pero si corecto, lo ta:”bo tin un punto ey; pero si mi no ta hera, nan no t’ey mas, ta abo t’ey.” Tur monkey di gobierno anterior a bira bo monkey, deal cu ne…

Tur esaki no ta un entrada ameno, ni agradabel pa cuminsa goberna, pero esey nos tur tabata sa. Tambe esunnan cu a yuda duna e partido cu tabata den gobierno nuebe asiento ainda, mientras cu un sonrisa grandi riba nan cara nan por para wak ta con e coalicion aki ta bay clear e job aki. Nos tur tabata sa, cu e tarea di e siguiente gobierno lo no tabata nada envidiabel, tampoco si pa casualidad lo tabatin un continuacion di e mesun gobierno. Si esey a sucede, nan lo mester a bay ruim op nan mes rotzooi, y lo nan tabatin e mesun problema gigantesco nan dilanti. Den e situacion aki, loke ta importante ta duna claridad semper kico tin nos dilanti. Y tambe, si tin medida pa tuma, tuma nan tempran den e proceso y no na final. Esaki pa dos motibo. Uno ta cu si bo gara e toro na su cacho di biaha, bo ta mira resultado mas tempran den e proceso tambe. Den e periodo di gobernacion aki caba, bo por cuminsa mira resultado, loke ta bon pa e gabinete mes. Si bo ta miedoso y bo ta tarda pa actua, bo ta haya bo forsa pa hacie toch, y bo ta bay campaña atrobe, cu e problemanan riba mesa ainda.

Importante tambe ta pa realisa cu no tur cos cu a priminti, por cumpli o cumpli di biaha. Ehemplo: partido MEP a campaña cu baha edad di pension te 62 aña. Bunita promesa, pero con bo ta bay cumpli si e cos aki ta costa placa, cu bo no tin, miho dicho, nos no tin. Ofrece anto, en todo caso pa awor, un flexregeling pa tur dos banda, esunnan cu kier bay tempran cu pension, cu menos placa, o esunnan cu kier bay mas laat y haya un miho pension. Contal cu e caha di SVb, cu nos placa, no ta sufri daño.

Pero pa bolbe riba e asunto di verlanglijst; nos tambe por tin un lista di deseo. No como medio di comunicacion directamente, pero si algun asunto cu nos ta kere cu ta di interes general. Eseynan ta por ehemplo e casonan grandi di corupcion, di cual nos no sa sigur cu tin investigacion andando. Na prome luga naturalmente e ministro saliente di Infrastructura, cu lo mester bay splica ta kico el a haci den tur e añanan ey cu propiedad publico.  Despues ta sigui naturalmente e aventura di e ministro encarga cu Energia, cu a causa e debacle di hedging, tirando culpa riba e director. Nan ta lubida cu nos no ta lubida, cu den e statuutnan di WEB Aruba NV ta poni bon cla cu e director no ta autorisa pa firma pa gasta un suma di mas di Afl. 200.000, por lo tanto ta un plan o eror, o tur dos, di e hunta di supervision y probablemente mas halto den e herarkia, incluyendo gerencia di Utilities NV y e propio ministro.

Nos lista di deseo ta inclui tambe un investigacion profundo di e scandal na Setar NV, cu di banda di e gerencia y di banda ministerial a purba tapa di tur manera. Hecho ta keda cu den un delito serio, cometi na Aruba, te awe e gerencia, asina leu cu nos sa, no a haci denuncia cerca nos autoridadnan hudicial. Nan lo mester duna cuenta pa esaki, esey no ta nada mas cu normal, no ta trata di simpatia o antipatia pa ningun hende.

Tin mas asunto di e tipo aki riba nos verlanglijst. Nos lo no mira nan tur cumpli pareu, esey nos por comprende. Pero e bentaha grandi di nos deseonan ta cu nan por trece placa den caha, y e otronan ta costa so…