Formacion di gobierno: Gobernador ta cuminsa consulta awe cu MEP, POR y RED

Gobernador di Aruba, su excelencia Alfonso Boekhoudt, a ricibi e prome documento for di informador diabierna merdia 5 di october. E informador sr Arie Swaen, a cuminsa traha riba e rapport riba 29 di september. Por medio di un comunicado di Gabinete di Gobernador di Aruba, ta informa cu awe gobernador , a base di e rapport di e informador, lo consulta individualmente cu lidernan di partido MEP, POR y RED. E consultanan aki lo tuma luga durante e dia di awe.

Manera nos a publica siman pasa, si sr. Swaen lo sigui acumula informacion despues di e prome reportahe ta pa gobernador dicidi.  Ora cu sr. Swaen a sali di Gabinete di Gobernador pa laga su rapport na disponibilidad di gobernador sr. Swaen a splica na prensa cu el a papia cu tur partido politico cu posibelmente por forma un gobierno eventualmente. Alabes sr. Swaen a papia hunto cu tur otro partido cu a participa cu eleccion y instancianan cu lo tin informacion relevante pa formacion di gobierno.

Si sr. Swaen lo fungi alabes como formador, no ta na dje pa dicidi. “Awo nos a caba di entrega e rapport pues mester duna gobernador su tempo pa sinta cu su conseheronan pa wak kico lo bin despues. E lo informa nos si nos trabou mester sigui”. En caso cu e gobernador mester di mas informacion lo duna sr. Swaen e tarea pa sigui cu su rol como informador.

Despues cu e proceso di informacion cana su caminda e gobernador lo dicidi ken lo bira formador. Pero mester laga e proceso cana su caminda, segun sr. Swaen.

Zakenkabinet parti di conseho
Sr. Swaen a nenga di duna comentario mas detaya riba e proceso di formacion y e contenido di e rapport cu el a entrega pasobra ‘mester por respeta cu gobernador lo tuma decision corecto’.

Sinembargo si a considera un zakenkabinet pa forma gobierno manera algun instancia a expresa di kier, sr. Swaen a confirma cu esaki tabata parti di e conseho cu a wordo duna.

“E ta un tiki fastioso cu nos no por divulga e contenido detaya di e rapport pero esaki tin su rason”. Segun sr. Swaen no tin ningun fecha fiho pa caba cu proceso di formacion di gobierno. Ora prensa a puntra kico ta opinion personal di sr. Swaen riba e cantidad di tempo cu e proceso lo por tuma, sr. Swaen a nenga di comenta pasobra ‘mi opinion personal no ta relevante actualmente pasobra mi ta para kinan como informador’.